ASF avanga kum 2022-a Vawk suat te hnenah zangnadawmna semchhuah tan a ni dawn
Kum 2022-a ASF avanga Mizoram-a Vawk suat (culled) te hnena zangnadawmna semchhuah phalna (Release) hun leh African Swine Fever (ASF) chungchang inzirtirna hun hi nimin khan Aizawl-a Vety Polyclinic Hospital Conference Hall-ah neih a ni a, he hun hi AH&Vety Minister C. Lalsawivunga chuan hmanpuiin ASF hrileng hi kan State-in kan tuar nasa hle a, State Disaster-ah dan leh dun tihfel hnu-a puan turin hmalak mek a ni tih a sawi a. Vety department chu thawktute an indaih lo nachungin an phak tawka he natna dona kawnga an hmalakna te chu fakawm a tih thu leh Ranvulhtute tana innghahna tlak ni zel tura tan la sauh sauh turin a chah a. Sawrkar pawhin theihtawp a chhuah zel bawk tih a sawi a ni.
AH&Vety Minister chuan ASF hri chu ven leh tihdam a nih theih nan sawkar laipui-ah a damdawi leh hri danna vaccine siam emaw, ramdang atanga lakluh dan tur ngaihtuah turin Department chuan Sawrkar laipui-ah a thlen thu a sawi a. Kum 2024 chhungin October ni 7 thlengin Vawk thi 13,809 awm tawhin Vawk 23,010 suat a nih tawh thu a sawi a, Vawk suat Compensation hi kum 2025-2026 chhung Assistance to State for Control of Animal Diseases (ASCAD) Action Plan-ah telhin Govt. of India-ah dil leh tur a ni a. Compensation funding pattern hi 50:50 anih avangin Mizoram sum tam tak a kal ral a. Hei vang hian 90:10 a min tihsak turin dilna pawh thehluh tawh a nih thu leh North Eastern States dangte nena inthurualin bawhzui tum mek a nih thu a sawi bawk.
Minister chuan Vawk vulhtute rilru put hmang siamthat kan mamawh thu sawiin, ASF avanga vawk thi te tuihawk luankawr, kham-a paih leh uluk lo taka phum ching an awm thin chu pawi a tih thu a sawi a, he natna a darh zel loh nana fimkhur turin a chah a. ASF avanga Vawk thite sumdawnna a hmanga zuar an awm thin chu tawp se a duh thu a sawi bawk a ni.
Tun tumah hian kum 2022 chhunga ASF hri leng avanga Mizoram-a Vawk suat sak chhungkaw 1847 hnenah zangnadawmna hi pek tura ruahman a ni a, a vaiin cheng nuai 263.32 pekchhuah a ni a. Tun tumah hian an sum dawn tur atanga za zela 25 (25%) pekchhuah tur niin a bak 75% pawh hmuh leh thuai beisei a ni a. Zangnadawmna hi District tina thuneitute'n an District theuhah an sem hhuak leh dawn a ni.
Serchhip District-a AH&Vety Officer Dr. H. Vanlalrawna chuan Serchhip District chhunga kum 2022-a ASF avanga Vawk suat te hnena zangnadawmna pe tur hian ruahmanna an siam mek thu nimin khan LENKAWL a hrilh a, kum 2021-ah Serchhip District in ASF hi tuar na viau mah se kum 2022-ah erawh an tuar nep tih sawiin, Vawk thi 335 awmin Vawk 621 suat a nih thu a sawi a, kum 2023-ah phei chuan ASF hri hi Serchhip District-ah a awm loh thu a sawi a ni.
Serchhip DVO chuan tun tuma zangna-dawmna pek tur hi Serchhip District-ah chhungkaw 59 an nih thu a sawi a, Serchhip-ah chhungkaw 10, East Lungdar-ah 8, Lungchhuan, Khaw-lailung leh North Vanlaiphai-ah 7 theuh, Sailulak leh Bungtlang-ah chhungkaw pali ve ve, Bawk-tlang-ah chhungkaw 3, Chhuanthar Tlangnuam leh Hriangtlang-ah chhungkaw pahnih ve ve leh Leng, North Mualcheng, Thenzawl, Keitum leh Khumtung-ah chhungkaw pakhat theuh te an ni a. Karleh lamah chuan Bank Account kaltlanga zangnadawmna sum hi semchhuah hman an inbeisei thu Serchhip DVO chuan a sawi bawk.
Comments
Post a Comment