In chhia senghawi hna thawk

Niminpiah (Oct. 8, 2024) tlai-a Keitum khua a leimin in chenna In pakhat leh In sak mek pakhat a hnawl te senghawi hnatlang chu nimin khan neih niin Serchhip Sub-Hqrs. YMA hruaitute chu hnatlang a thawkte hi tlawhin thingpui lumna tur sumfai an pe.
Niminpiah tlai dar 3:00 vel khan Keitum khuaa NH. 54 kawngpui thlanglam min chuan a thlang lama Pu Rualthangvela In luahlai chu dinhmun hlauhawm ah siamin tlai dar 5:00 velah a bula Lalrengpuia In saklai mek nen a hnawl vek a, a thlang Lane-a chhungkaw thenkhat te In pawh luah zui ngam lohin a awm bawk a, nimin zing thleng khan lei hi a che zui bawk a ni.

Keitum Village Council leh Keitum Branch YMA te chuan nimin khan khawtlang huap hnatlang kovin heng In chhia senghawi hna hi thawh a ni a, he hnatlang-ah hian mi thahnem tak thawkchhuakin Serchhip Sub-Hqrs. YMA OB ten hnatlang a thawk te hi a hmunah tlawhin chhiatna thlen dan te an enfiah a, vanduaina tawk te an tawrhpui thu sawiin, hnatlangte thingpui lumna atan Kei]um Branch YMA hruaitute hnenah sumfai an hlan nghal bawk a ni.

Keitum khawtlang hruaitute hian leiminna hmun ah hian leikhi a awm tawh thu sawiin, hei hi kawng siamtute chuan Cement hmanga an hnawh thu an sawi a, amaherawh chu a kar-ah hian tuihawk hi lutin hei hi kawngpui dawlna (Retaining Wall) chuan zo lovin lei hi a min ta nia an hriat thu leh ruah a sur leh chuan la min thei nia an ngaih thu an sawi a ni.