Aizawl - Delhi IndiGo Flight a let-a tihpun thar Chief Minister in Lengpui Airport-ah a hawng

Chief Minister Lalduhoma chuan Delhi leh Aizawl inkar-a IndiGo thlawhna thlawk a leta tihpun (doubling of flights) thar chu Inrinni khan a vailiam.

Kumin January ni 4-a Chief Minister Lalduhoma leh Ministry of Civil Aviation thuneitu sang, Secretary V. Vualnam leh Vanlaldina Fanai, khatih laia Chief Financial Controller te Delhi-a an inkawmnaa an ruahman anga Delhi leh Aizawl inkara thlawk thin IndiGo thlawhna a leta tihpun (doubling of flights) thar hawnna hunah hian Chief Minister Lalduhoma chuan kan mamawhna min hriatpuia hetiang kan neih theih nana hma min laksaktu Ministry of Civil Aviation, Govt. of India leh IndiGo Airlines te chungah lawmthu a sawi a. Hei hian India ram laili leh Mizoram chu inpawh nasa lehzualin min siam dawn tih a sawi a, Officials chet velna atan te, sumdawngten hma thar an lakna atan te, phai lam pan ngai damlo tan te, leh zirlaite tan te a tangkai em em dawn tih a sawi a. “Kan ram mawi tak hi tlawhpawh awl lehzualin min siamsak a, khualzin tan tlawh pawh kan awlsam lehzual dawn a ni,” a ti bawk.

Chief Minister chuan Mizoram sawrkarin Civil Aviation hmasawnna lamah hma a la chho zel dawn tih pawh sawiin, Lengpui tumhmun pawh a tul anga tuaihnum chhoh zel a nih tur thu te, Mizoram hmun thenkhata Heliports din a nih tur thu te a sawi bawk a ni.

IndiGo in thlawh thlawk zat a leta an tihpun chhan hi kumtir lama Chief Minister leh Ministry of Civil Aviation hotute Delhi Mizoram House-a an inkawmnaah Aizawl Thlawhna ticket man to lutuk tihtlawm nana Thlawhna tam zawk thlawhtir a rawtna tihhlawhtlinna a ni tih sawrkar thuchhuah chuan a tarlang a. A hawnna inkhawmah hian R K Singh, IAS (Rtd), Special Director, IndiGo pawhin thu sawiin, “He kan hmalakna hian India ram laili leh Mizote inkarah inunauna tha zawk, inpawhna nghet zawk a siam kan beisei a. Mizoram sawrkar hmalaknaah kan lawm hle a ni. Mizoram in thlai thar hralh tur a neih, Thlawhnaa phurhchhuah theih dan tur pawh kan lo dap ang a. A hranin ruahmanna duan kan lo tum ang,” a ti bawk.

IndiGo hian kar khata thlawhna vawi 5 an lo thlawhtir thin chu vawi 10-ah an tipung dawn a. Nitin-a thlawk a awm bakah Nilaini, Zirtawpni leh Pathianni-ah vawi hnih thlawk a awm dawn a. Chief Minister hian Thlawhna thlawk belh hmasa ber tur lawmna cake a zai a, a chuang tur passenger thlanchhuah pakhat hnenah Boarding Pass hlanin, Thlawhna thlawkchhuak tur hi a vailiam bawk a ni.