Winery pahnihin an duh khawp Grape an lei

Mizoram-a Grape Winery pahnih, Hnahlan leh Champhai Winery-te chuan kuthnathawkte Grape lei chu an chawlhsan a, Winery-te hian an duh tawk lei tur an hmu ve ve a ni.

Hnahlan Grape Growers & Processing Cooperative Society hruaitute chuan kumin hian Grape qtls. 1,500 vel an thar nia an hriat thu sawiin, Hnahlan Winery-ah erawh kum hmasa lama Grape tui la hralh loh engemaw zat an la neih avangin kumin ah hian qtl. 870 vel chauh an lei niin an sawi a. Chhungkaw tam tak chuan an thiam dan ang angin Grape hi an um niin an sawi. Grape rah hi winery-ah kg khat Rs. 60-in lei a ni a, kuthnathawktute Grape hralhna man hi a tir lamah pek tlak (payment) nghal zel a ni a; mahse, sum harsatna avangin eng emawzat bat a ni a, pawisa ba hi October, 2024-ah chuan rulh vek an tum niin Society hruaitute chuan an sawi.

Champhai Grape Growers Society hruaitute chuan kumin ah hian grape qtl.1,200 vel an lei tih sawiin, a dahna tur zem an neih tawh loh avangin hei bak chu lei theih a ni lo niin an sawi a, Grape rah an leina sum pawh zawi zawia pek zel an tum niin an sawi bawk.

Hnahlan Grape Growers & Processing Cooperative Society hian July 17, 2024 atang khan kuthnathawkte Grape hi an lei tan a. Champhai Grape Growers Society hian July 9, 2024 atang khan Grape hi an lei tan thung a ni.