Lirthei neitu ten an harsatna Minister-ah thlen

Vantlang phur chi leh ei leh in phur lirthei pawl hrang hrang 12 intelkhawmna, Mizoram Commercial Vehicle Union chuan tuialhthei man sang avangin an hna an thawh theih loh thu nimin khan Taxation Minister Dr. Vanlalthlana hnenah an thlen.

Mizoram Commercial Vehicle Union hruaitute sawi danin Mizoram-a tuialhthei man sang avang hian nawrh an tum ni lovin an tan hlawkna a awm tak loh avangin din rih mai an ngai dawn tih an sawi a, Tuialhthei man sang avang hian an rate an san a ngai dawn a, rate an pun chuan mipuiin an tuar dawn si a, hei hi an ngai ngamlo tih an sawi a, Truck hian Bairabi Railhead atanga Lawngtlai thlen nan Diesel litre 450 vel a mamawh a, chutah Rs. 8 dawna Oil man a pun chuan hlawh an nei dawn lova, an tlan thei tawh dawn lo tih an sawi a ni.

Tarlan tawh angin, Taxation Department chuan thuchhuah siamin Mizoram sawrkar chuan September thla atang khan Petrol leh Diesel-a Value Added Tax (VAT) a lak thin a tisang tih tarlangin, Social Infrastructure & Services Cess leh Road Maintenance Cess a la dawn tih a tarlang bawk a. Diesel-a chhiah 5.23% lak thin chu 10%-ah tihsan niin Petrol-a chhiah 16.36% a lak thin chu 18%-ah tihsan a ni tih tarlan a ni a, Perol leh Diesel-ah hian Social Infrastructure & Services Cess Rs. 2 leh Road Manintenance Cess Rs. 2 lak a ni dawn tih tarlan a ni bawk.