Tun thla atangin sawrkar in ruang phurh mawh ah a la

Social Welfare Minister Lalrinpuii chuan ruang phurh chu tun thla September ni 1 atangin Mizoram pumpuiah sawrkarin mawh ah a la tawh dawn tih a sawi.

Nimin-a a Pisa-a thuthar theh-darhtute a kawmna Minister Lalrinpuii chuan ruang phurh nan budget ah cheng nuai 500 dah a nih thu sawiin, ruang phurhna atan sawrkar hnuaia Motor inziaklut zinga Empanel te chu hman theih an ni dawn tih a sawi a, ruang phurh man chu sawrkar ah dil let theih a ni dawn tih a sawi a ni. Minister chuan ruang phurh tanna leh a dahna inkar chu KM 20 tal a ni tur tih pawh sawiin, ruang phurhna atan lirthei pakhat chauh hman tur anih thu te, Department in a kenkawh dan an siamsa vek thu leh ruang phurhna man hi Department ah emaw, District chhunga District Social Welfare hnenah thehluh theih a ni dawn tih a sawi a, an motor hman man chu sawrkar in rate a siam angin a rul let dawn tih a sawi a ni. Minister chuan damdawiina thi anih loh chuan dilna form-a inziak angin thuneitu hriatpuina thil tel tur a ni dawn tih pawh sawiin, he ruahmanna hi MLA te phurrit lutuk chhawk tur leh mi tam zawk huapzo tura tih a nih thu a sawi bawk.

Women & Child Development Minister Lalrinpuii chuan Mizoram State Commission for Women Chairperson Lalchhandami chu Birth Certificate sawrkara a thehluh angah dan kal a awmlo tih a sawi bawk a. MSCW Chairperson Lalchhandami chu kum 1960-a piang a ni tih sawiin, a Certificate thehluh chu pawmsak anih avangin tuna a hna chelh chu a thawk thei niin an ngai tih a sawi a, mi tam tak chu Birth Certificate diktak leh sawrkar kum inmil lo fo an awm thin avangin zirchian mek a a nih thu a sawi a. Lalchhandami chu rintlak tak niin an duhsak bik vang ni lo in MSWC Chairperson tur an zawnna ah tha bera an hriat avanga ruat an ni tih a sawi bawk.