Kan Hnam tobul chhuitu tur din tum mek a ni

Chief Minister Lalduhoma chuan ZPM sawrkar in kan hnam tobul chhuitu tur din a tum mek tih a sawi.

Mizo Society of America bultuma Rockville, Maryland, USA-a ‘Mizo Day, 2024’ a hmanpuina ah Chief Minister Lalduhoma chuan khawvel puma Zofate'n inunauna leh inpumkhatna nghet zawk an neih theihna tur thinlung pu chungin Mizo Day chu hmang turin kalkhawmte a sawm a, Mizo inti zingah mahni hnam hminga Mizo tih hming hmang pakhat mah kan awm lo tih sawiin, kan zavaia huap hnam hming a nih tawp thu a sawi a, Lushai, Kuki, Chin tihte chu pianpui hnam hming (generic name) ni loin, hnamdangin min kohna mai a nih thu sawiin, “Kan zavaia kan pawm tlan theih hnam hming min huapzo a lo la pian erawh chu ka beisei tlat a ni,” a ti bawk.

Chief Minister chuan unau Burma, Bangladesh leh Manipur-a chengten harsatna an tawh avangin himna zawngin Mizoram an rawn bel tih sawiin, tunah hian chutiang Displaced people chu enkawl lai mi 40,000 vel kan nei reng tih a sawi a. Heng mite enkawlna kawngah India Prime Minister, Home Minister leh Finance Minister-ten an mamawh an thlen te inhawng tak an lo dawnsawn thin avangin lawmthu a sawi a. Mizoram beltu harsatna tawk te tan USA-a awm Mizo unaute pawhin an neih sum leh pai sengin tanpuina thahnem tak an rawn pe thin tih sawiin, an zarah an thla a muan thin thu leh lawmawm a tih thu a sawi bawk.