GST pe lo leh pe diklo an tam tih Minister in a sawi

Taxation Minister Dr Vanlalthlana’n Mizoram-ah GST pe lo leh pe dik lo an tam tih sawiin, Kristian taka tha taka Chhiah pe thin turin Mizo mipuite a ngen tih a sawi.

Tuialhthei man sang chungchanga thuthar lakhawmtute niminpiah-a a kawmna ah Taxation Minister chuan mipuite tanrual puiah sawmin, GST lak chungchangah thil diklo ti an awm chuan Department-ah hriattir zel turin a ngen a. Midang enkawl (Rendering of services) Departmental Work atangin chhiah, Goods & Services Tax (GST) lak tan a nih thu a sawi a, kum 2019-a Mizoram sawrkarin Composition Sscheme a siam angin GST hi lak a ni dawn tih a sawi a. Sawrkarin GST leh Profession Tax-ah huang a zauh mek thu sawiin, Estimate a awm tawh reng si, chhiah pek loh ang chi chu sawrkara lakluh dan an ngaihtuah thu leh Departmental Work hnuaia mi dangin hna an enkawl sak (Rendering of services) atangin GST lak a nih tawh dawn thu a sawi a, GST chu cheng nuai 10-50 inkarah zaa 6 lak tur a nih thu leh cheng nuai 50 chung lamah zaa 18 lak a nih dawn thu a sawi a, Department in an thawk a nih chuan GST lak a ni dawn lo tih a sawi a. Departmental Work atanga GST lak chu Dan hnuaiah fimkhur taka an kalpui thu sawiin, Schedule of Rates hmangin Department te chuan an hna tur an chhut thin thu leh SoR-ah chuan GST a tel vek thu a sawi a ni.

Thla liam ta August ni 21-a Mizoram Legislative Assembly thutkhawmah The Mizoram Goods and Services Tax (Amendment) Bill, 2024 hi passed a ni tih Minister chuan sawiin, hemi chungchanga a sawina ah Input Service Distributor siamthat a nih thu leh thil siamchhuaktu ten an thil siamchhuahna khawl an register loh emawa hremna awm thei tarlan a ni tih a sawi a. Input Tax Credit a awm thar dawn tih sawiin, hei hian State danga Office nei ten hmundanga GST an lo pekin Mizoram lamah an an pek tlem theihna tur ngaihtuah sak an ni dawn tih a sawi. GST Act chu Central leh State in thuneihna insemzai hmanga a kalpui a nih thu leh Central GST Act chu kum 2017 atanga hman tan niin Central emaw State in mahni duhdana lo siamthat ngawt theih a ni lo tih a sawi bawk.