Thu dik lo thehdarh niin sawi

Mizoram Indane Distributor Association (MIDA) leh Mizoram RGGLV Distributor Association (MRDA) chuan LPG delivery chungchang leh Delivery Charge chungchang ah Social Media-ah thu dik tawk lo leh Print Media hrang hrangah thehdarh a tam hle niin an sawi.

Nimin a thuchhuah intawm an siamah MIDA leh MRDA te chuan Oil Marketing Company - IOCL, HPCL leh BPCL-te chuan Central Sawrkar in inkaihhruaina a siam angin LPG supply-ah hian a tam thei ang ber Digital Platform hmang turin an tih thu tarlangin, “Digital Booking, Digital Payment, DAC, PDC feedback etc hi India ram pumah kalpui niin uluk taka vil reng a ni a. Tunhnaia sawi hlawh tak Delivery Authentication Code (DAC) leh Delivery Charge hi thil hrang inkaihhnawihna nei lo a ni,' an ti.

MIDA leh MRDA thuchhuah tarlan danin, DAC hi Home Delivery nena inkaihhnawih anga sawi niin Home Delivery kalpui lohnaah chuan LPG Agent-ten phut kher lo tur anga sawi chu thu dik tawk lo tih an sawi a. “DAC hi Delivery Authentication Code a nih ang hian customer-ten LPG an la ngei a ni tih finfiahna a ni. Home delivery a ni emaw, Point Delivery (khawlai a sem) pawh nise Customer Onlinet-a Booking ti zawng zawngten an kalpui ngei tur a ni. Hei hian a tum chu LPG hi Black Market a hralh a nih lohna tur leh Consumer dik takte hnena LPG pek a nih theih nana Central Sawrkar hmalakna pakhat mai a ni,” an ti.

DAC leh Delivery charge chu thil hrang a nih thu leh DAC avangin Delivery Charge hi chawi belh ngai anga sawi leh LPG Distributor te hnena dik lo taka pawisa chawi belhna anga sawi chu thil hriat dik tawk loh a nih thu an sawi a, “DAC titute hi Consumer-te an ni a, DAC an tih avangin pawisa an chawi ngai lo tih hretu pawh an mahni tho an ni,” an ti bawk.