Darlawn-ah Ruihhlo dona a hmalak dan tur sawiho

Excise & Narcotics Minister Lalnghinglova Hmar hovin nimin khan Darlawn-a BDO Conference Hall-ah ruilhhlo do chungchanga hmalak zel dan tur sawiho a inrawnkhawmna neih a ni a, he hunah hian END Minister chuan ruihhlo do chungchanga Sawrkar hmalakna hrang hrangte tarlangin, Darlawn khawtlangin ruihhlo do an kalpui zelna turah Sawrkarin theihtawp chhuahpui a inhuam thu a sawi a; Kohhrante pawh hemi kawngah hian nasa lehzual zawka hma la turin a ngen a. Zirna in, School leh College-ah te ruihhlo ti lo tura inzirtirna nasa zawk kalpui a tul thu sawiin, zirtirtute pawh tan la thar leh turin a ngen a ni.

Lalnghinglova Hmar chuan Zirna In - School leh College-ah te ruihhlo ti lo tura inzirtirna nasa zawk kalpui a tul thu sawiin, Zirtirtute pawh tan la thar leh turin a ngen a. Ruihhlo do kawngah Department hrang hrangte thawhho a tul thu sawiin, “Ruihhlo do kawngah YMA chuan theihtawp chhuahin tha pawh an thawh hnem a, chutih rualin VC, Kohhran leh MHIP te pawhin ngaihtuahna thuk zawk kan senpui a tul a, hlawhtling tur chuan kil hrang hrang atanga thawhhona tha neih a tul a ni,” tiin Darlawn khawtlang in ruihhlo dona kawnga an hman atan Rs. 10,000/- a hlan nghal bawk.

He inrawnkhawmna hi Darlawn RD Block-a BDO N. Lalzarzova chuan kaihruaiin Darlawn khawchhunga Sawrkar Department hrang hrang aiawh te, tlawmngai pawl (NGOs) aiawh te, Kohhran aiawh te leh Kohhran thalai pawl hrang hrang aiawh te an tel a. Kalkhawmte atangin Darlawn khawtlang leh a chhehvela ruihhlo leh ruihhlo ngaite dinhmun tarlan a ni a. Ruihhlo Do kawnga hmalakna awm mek leh harsatna an tawh hrang hrangte sawichhuah a ni a. Ruihhlo do kawngah Sawrkar, khawtlang leh Kohhran tanrual a tulzia te sawiho a ni bawk.