Kolasib District-ah kawng siam hna thawk tan

Mizoram chak lakna kawngpui, Kolasib atanga Durlui (Kolasib District chin) inkar National Highway 6 chhe zual lai thawmthat hna chak zawka thawh a nih theih nan lirthei lian te chu chhun lamah kal phal a ni lova; hnathawh ti khaihlak thei lirthei lian veivak tur te chu hmun hrang hrangah Police duty ten an dang.

Helai kawnga tlan thin lirthei lian te hi nimin zing dar 8:00 atang khan Kolasib Rengtekawn leh Aizawl lamah Ch. Saprawnga Truck Terminal, Rangvamual-ah te dan a ni a, lirthei dan a nih hmaa helai hmun paltlang hman lirthei te hi Kawnpui-a Sairang peng leh Khamrang bulah te dan chah rih a ni bawk.

Kawng thawmthat hna chak zawka thawh a nih theih nana chhun lama lirthei lian tlan tir khap a nih avang hian kawng siam hnathawktu te chuan hnathawh pawh a sawt niin an sawi a, lirthei kal dan mumal taka ruahman a nih tawh avangin kawng siamna tur lung phurtu lirthei leh khawl te pawhin an hnathawhna tur hmun a hun takah an thleng thei tawh tih an sawi bawk.