Thla riat chhungin Malaria vanga thi mi 5 awm

Kumin January atanga August thla tawp, thla riat (8) chhung khan Mizoram-ah Sikserh Malaria natna avangin mi 5 an thi a, heng mite hi Lawngtlai District ami vek an ni.

Health and Family Welfare hotute sawi danin kumin January atanga August thla tawp thleng khan Mizoram-ah Sikserh vei-a rinhlelh mi 2,15,039 te thisen endik a ni a, heng atang hian mi 14,634 te chuan Sikserh natna an kai tih hmuhchhuah a ni a. Sikserh vei hmuhchhuah zinga 7,858 hi PF an tih mai, Plasmodium Falciparum Parasite kai an ni a, chu chu Sikserh hri kai zawng zawng atanga za zela 53.70 an ni a, mi 6,776-te chuan PV an tih mai, Plasmodium Vivax an kai thung a ni. Kumin chhunga Mizoram-a Sikserh kai zinga mi 5 te chuan an thihpui a, an vai hian Lawngtlai District a mi te vek an ni.

Kumin chhung hian Aizawl District-ah Sikserh hri kai inringhlel thisen endik an tam ber a, mi 63,458 thisen endik a ni a, Sikserh natna vei hmuhchhuah chu mi 67 chauh an ni a. Lawngtlai District chu Sikserh vei leh vei lo thisen endik tamna ber dawttu niin thisen 37,274 endik zinga 7,003 chuan Sikserh an vei tih hmuhchhuah a ni a. Sikserh vei hmuhchhuah zinga a tam zawk, mi 4,165-te chuan PF an vei a ni.

Sikserh vei leh vei lo hriatna atana thisen endik tam ber pathumna chu Lunglei District a ni a, mi 33,056 thisen an endik zinga mi 3,188 chuan Sikserh an vei tih hmuhchhuah niin an zinga 2,027 te chu PF vei an ni. Sikserh vei tamna thin tho Mamit District-ah chuan mi 18,692 thisen endik zinga 2,738-te chuan he hri hi an kai tih hmuhchhuah a ni a, Mamit-ah hian PF aiin PV vei an tam zawk a ni. Mizoram-a Sikserh natna vei tamna District 3-te hi Bangladesh nena ramri intawm vek an ni a. District lum berte zinga ngaih Kolasib-ah chuan Sikserh vei leh vei lo thisen 12,027 endik a ni chungin a vei hmuhchhuah chu mi 13 chauh an ni a, an zinga pakhat chauhvin Malaria PF a vei a ni.