Kum dik lo-a ziak Voluntary Pension-a chhuak tam tawh

Sawrkar hnathawk, pian kum dik loa inziak, an pension hun (kum 60) a thlena Voluntary pension-a chhuak Mizoram-ah mi 70 chuang chhin-chhiah an awm tawh a. Hemi chungchang inzirtirna hi a theih ang anga kalpui a nih avangin kum dik taka pension tum mi engemaw zat an awm mek nia thudawn a ni.

Sawrkar hnathawk kalphung hrang hrang zirchianga lehkhabu pawh eng emaw zat lo chhuah tawh, Accounts & Treasury-a thawk, Ellis H. Pachuau thusawi kan thulakna in a tarlan danin, a hunlaia kum dik loa inziak/ziahsak, kum dik taka pension-a chhuak hi Mizoram-ah kum 2010 vel atangin chhin-chhiah a ni a, tun thlengin mi 70 chuang an tling tawh a ni. Ellis H. Pachuau hian a theih ang angin hetianga kum dik taka pension-a chhuakte hi a chhinchhiah thin a, a hnena in-report pawh awm thinin hriat vek sen erawh a har avangin kum dik taka pension-a chhuakte hi tun dinhmuna chhinchiah mi 70 ai hian an tam rin a ni thung.

Kum dik taka pension-a chhuakte avang hian sawrkarin sum tam tak a hum phah thei tih thulakna chuan tarlangin, kum dik taka pension-te vangin an hnuaia mite an kaisan theih phah rualin, kum dik lo avangin kum dik taka ti te kaisanna hun a awm loh phah thei niin a tarlang bawk.

Tun dinhmunah Mizoram sawrkar hna-thawk nawlpuite pension hun chu kum 60-ah bithliah a ni a, hei hi zawma a hun taka pension-a chhuak tura inzirtirna sawrkar hnathawkte zingah a theih ang angin kalpui a ni a. Hei hian rah tha a chhuah mek zelin inziak naupang zingah pawh a hun dika chhuah tum tam tak an awm a ni.

Hetihlai hian Mizoram sawrkar hnathawk inzawmkhawm pawl, Federation of Mizoram Government Employess & Workers (FMGE&W) chuan Mizoram sawrkarah pension hun kum 62-a pawhsei an lo dil/ngen tawh thin a, a hlawhtlinnna erawh tun thlengin a la awm lo thung.