STA-in lirthei chuanman a bithliah an zawm tha lo

State Transport Authority (STA) chuan man chawia mipui phur lirthei ten chuanman an bithliah an zawm that loh avangin Aizawl-ah Online hmanga lirthei koh theihna, Online Cab Booking System a kalpui dawn.

Hemi chungchanga State Transport Authority (STA) thuchhuah tarlan danin Mizoram-a passenger phur chi lirthei (Public Transport) chuanman State Transport Authority-in a siam thin chu man chawia mipui phur lirthei neitu ten an zawm tha tawk lo hle thin tih hriat a nih thu an tarlang a. Hei vang hian mipuiten lirthei chuanman dik tak man chawia an hman theih nan leh awlsam zawka lirthei hire tur an koh theihna turin Online hmanga lirthei koh theihna (Online Cab Booking System) kalpui turin hma a la mek tih a sawi.

Thuchhuaha an tarlan danin Aizawl khawpui chu kalpui hmasakna (Pilot Project) atan hman ni se tih a ni a. Online Cab Booking System hi tih hlawhtlin a nih hunah chuan mipui ten lirthei hman man dik tak an chawi thei tawh tura beisei a ni tih thuchhuahah hian an tarlang a ni.

STA chuan kumin March thla khan thuchhuah siamin kumin February ni 19-a STA thukhawmin a rel angin, man chawi a mipui phur lirthei service, Taxi, Auto Rickshaw leh Maxi Cab te chuanman a bithliah thar a. Hemi ang hian 2-Wheeler Taxi chuanman chu KM 1-ah Rs. 30 niin KM khat hnuah erawh KM tinah Rs. 20 zel a ni anga. Taxi pangaiah KM 1-ah Rs. 55 niin hemi hnuah KM tinah Rs. 45 zel a ni ang. Auto Rickshaw chuanman chu Km khatah Rs. 35 niin a hnu KM tinah Rs. 25 zel a ni anga, Maxi Cab chu Metal Road-a a tlanin KM 1-ah Rs. 3.50 leh Metal Road lo-ah Rs. 4 ni turin a lo rel tawh a ni.