MIRSAC Website thar leh Data Order Portal tlangzarh

Mizoram Remote Sensing Application Centre, Science & Technology (MIRSAC) chuan awlsam zawka mipui ten an Office an dawr theih nan Website thar leh Data Order Portal an tlangzarh.

Directorate of Science & Technology Office, Aizawl-a MIRSAC Website thar leh Data Order Portal tlangzarhna hunah hian Principal Scientific Officer K. Lalrammuana chuan MIRSAC Website leh a chhunga Data Order Portal buatsaih a nih dan leh hman tangkai theih dan turte a sawi a. Tuna MIRSAC hmalakna hi Website thar siam ngawr ngawr ni lovin, a mamawhtute tana Space Technology leh chumi atanga data siamchhuahte mahni In lum atanga awlsam tak leh tangkai taka hman theih tura chhawp chhuah chu a tum bulpui ber zawk a ni tih a sawi bawk. He hmalakna hian Sawrkar laipui leh state sawrkar pawhin a ngaih pawimawh em em ‘Ease of doing Business’ policy a tawmpui thu leh Convention Method- mahni ngei Office-a kala data order ngai thinte chu kawng tam takin a chhawk zangkhai dawn tih a sawi bawk.

Website leh Data Order Portal hi Software Company, ‘SIRUK’ te siam niin website leh Data Order Portal kaltlang hian mipuiten MIRSAC data pawimawh chi hrangte awlsam takin an order thei dawn tawh a; Data Order portal-ah hian Scientific data (a bikin Remote Sensing leh GIS technology hmanga siam) te chu a mamawhtute tana order theih a ni dawn a. He portal hmang vek hian data order tawhsa chu a download theih bawk dawn a ni. Hemi tur hian a mamawhtute chuan User account siam tur a ni a, mipuiten tangkai taka hmang turin an sawm nghal bawk a ni. Hrechiang duh tan MIRSAC website mirsac.mizoram.gov.in leh Data Order Portal - data.mirsac.in-ah te luh tur a ni.