Rampum huap Zirtirtu tha chawimawina dawng

India ram a Zirtirtu tha chawimawina dawng zingah Synod HSS, Aizawl-a Lecturer Joseph Vanlalhruaia Sailo chu a tel.

President Droupadi Murmu chuan nimin, September 5, 2024 khan Zirtirtute ni pualin ramchhunga zirtirtu tha thlanchhuah mi 82-te hnenah ‘National Award To Teachers' 2024’ hlanin Mizoram atangin he chawimawina hi Joseph Vanlalhruaia Sailo chuan a dawng a ni. Joseph Vanlalhruaia Sailo hi Synod Higher Secondary School-ah Lecturer niin kum 2023 khan President hnen atang vek hian National Award for NSS Programme Officer a dawng tawh bawk a, kum 2022 khan State Teachers' Award a lo dawng tawh a ni.

National Award To Teachers' 2024 hi Vigyan Bhavan, New Delhi-ah President hian semin chawimawina hian Certificate, pawisafai Rs. 50,000 leh Silver Medal a keng tel a ni.