Sik leh sa inthlak in mihring hriselna a nghawng dan leh lo inven dan tur sawihona neih a ni

Nimin khan Health Minister Lalrinpuii hovin sik leh sa inthlak (Climate change) in mihring hriselna a nghawng dan leh chumi laka lo inven dan tur leh a tih nep (tih ziaawm) dan tur te sawihona neih a ni.

SAD Conference Hall-I a State Level Governing Body Meeting on Climate Change and Human Health (SLGBCCHH) Member ten sik leh sa inthlak (Climate change) in mihring hriselna a nghawng dan leh chumi laka lo inven dan tur leh a tih nep (tih ziaawm) dan tur an sawihona hunah hian Health Minister chuan sik leh sa nasa taka inthlak avanga mihring hriselna in a tuar theih dan leh a kaihhnawih chu a nasa hle tih sawiin, “Hriselna bakah khuarel chhiatrupna kan tih tam tak pawh hi sik leh sa inthlak avanga lo thleng te pawh an ni,” a ti a. Sik leh sa nasa taka inthlak avanga kan tawrhna hrang hrang te hi Department pakhat chauhin a hmachhawn theih chi pawh a ni lo tih sawiin, Department hrang hrang tanho ngaihna thil a nih thu a sawi a. “Chuvangin Department tin ten inlungrualna leh thawhhona tha kan neih a ngai takzet a. Thawhhona tha kan neih a tul zia hi in Department theuhva pawh lo sawi uar theuh turin ka ngen che u,” a ti bawk.

He hunah hian Health & Family Welfare Department changtu Secretary Sangchhin Chinzah chuan kalkhawm te lawmna thu sawiin, Climate Change hian mihringte-ah kawng tam takin hrasatna a thlen a, hriselna bikah pawh nasa takin nghawng a nei tih a sawi a. Chuvang chuan kum 2015 khan Prime Minister kaihhruaina hnuaia ‘Mission on Health’ hmalakna hnuaiah National Expert Group ten National Programme on Climate Change and Human Health (NPCCHH) hi an lo duang ta tih a sawi a. “NAPCCHH hi Ministry of Health and Family Welfare hnuaia kalpui niin,a programme NPCCHH hi kum 2019 khan tlangzarh a ni a. A thil tum chu sik leh sa inthlak in mihring hriselna nasa taka a nghawng tur ven leh tinep a ni,” a ti bawk.

Nimin-a he sawihona hunah hian Dr. Eric Zomawia, Member Secretary Mission Director, NHM in SLGBCCHH lo indin chho dan leh Mizoram pumpuia hmalak tawhna te a tarlang a, Dr. Vanlalrengpuia, State Nodal Officer, NHM chuan Powerpoint Presentation hmangin Climate Change in mihring hriselna a nghawng dan leh natna hrang hrang a thlen dan te, chumi laka lo inven dan tur leh a nghawng tih ziaawm tura hmalak dan tur National Programme on Climate Change and Human Health (NPCCHH) in a buatsaih chu a entir bawk a. Health Minister Rinpuii hian State Action Plan on Climate Change and Human Health (SAPCCHH) chu a tlangzarh nghal bawk a ni.