Buhhum-ah Support Price pek a ni dawn

Mizoram sawrkar chuan Mizoram tharchhuah Buhhum-ah Support Price a pe dawn a, Ration Card Var hmangte tana buhfai Subsidy rate thar chu thla thar atang khian hman a ni dawn.

Nimin khan Chief Minister Lalduhoma hovin Mizoram State Government Paddy & Rice Procurement Committee chu CM Office-ah thukhawmin Mizoram-a buh chingtuten hlawk ve tawk taka an Buhhum an hralh theih dan tur a ngaihtuah a. An lo zirchian tawhna behchhanin ruahmanna siam a ni a, Handholding Scheme nena kal kawp turin sawrkarin Mizoram tharchhuah Buhhum ah Support Price a pe dawn a. A bultan nan kumin ah Kolasib leh Mamit District-ah kalpui phawt tur a ni. A kalpui dan tur kimchang hi Vawiin-a Hand Holding Scheme hawnnaah puan a ni ang.

He thutkhawm ah hian Supply Minister B. Lalchhanzova chuan Ration Card Var neitute hnena subsidy rate thar kumin October thla attnga Mizoram puma kalpui tan a nih tur thu sawiin, “Sawrkar in Card Var tana subsidy Rs. 25 a pek thin chu thla thar October atangin Rs. 10 a pek tan a tum a. Mizoram pumah Card Var ho tan buhfai khul man Rs. 30 a ni tawh ang,” a ti a. Hei bakah hian October thla atang vek hian Retailer te lawmman pawh buhfai kg. khata duli (pawisa 50) ni thin chu cheng khat leh duli (Rs. 1.50) ah tihsan a ni tawh ang tih a sawi a. Retailer zawng zawngte chu buk dik taka mipui hnena buhfai pechhuak turin hriattir nghal an ni bawk.