MIC din hnuah RTI hmanga dilna 32,859 a lut tawh

Kum 2006 July thlaa Mizoram Information Commission (MIC) a din atanga kumin September ni 11 thleng khan Mizoram-ah RTI dilna 32,859 a lut tawh.

Nimin khan Convention Centre, Lunglei-ah Mizoram Information Commission (MIC) leh Lunglei District Legal Services Authority (DLSA) te ?ang kawp buatsaihin Legal Awareness leh RTI Dan zirhona neih a ni a, he huna tarlan a nih danin kum 2006 July thlaa MIC din a nih atangin September ni 11, 2024 thlengin Mizoram-ah RTI dilna 32,859 a lut tawh a, chung zinga 13,643 chu kum 2022 July thlaa online RTI kalpui a nih hnua online atanga lut a ni. RTI chhannaa lungawi lo, thuneitu sang zawk Departmental Appellate Authority (DAA)-a zualko (first appeal) 497 a awm thu pawh he hunah hian tarlan a ni a, hei hian Mizoram SPIO-te'n mipui an tilungawi thawkhat tih a lantir thu tarlan a ni bawk a. DAA hmalaknaa la lungawi zo lova MIC-a zualko leh (second appeal) 167 an awm thu leh MIC-a appeal lutte chu chinfel nghal zel niin, tun dinhmunah case pending a awm loh thu pawh tarlan a ni.

He hunah hian RTI Chhanna a lungawi lo Zualko vawi hnihnaa insawifiah tura MIC-in Public Authority an kohte chu an thu ngaihthlakna (hearing) hybrid mode-a kalpui a, a hmun ngeia kal emaw, online hmang emawa insawifiah tura an duh zawk thlan theihna remchang an siam thin thu pawh tarlan a ni a. August 2023 atangin Village Council leh Local Council te chu Public Authority-ah puan niin, VCP/LCC te chu SPIO-ah ruat an ni a, khawtlanga hmasawnna hna thawh chungchangah VC/LC te chu RTI zawhna zawh theih reng an ni tawh tih tarlan a ni bawk.

Nimin-a he hun hman hi Mizoram Information Commission atangin Chief Information Commissioner John Neihlaia IPS (Rtd) leh Information Commissioner Mangjangam Touthang IIS (Rtd) te chuan an hmanpui a ni.