Serchhip Road Protection Squad thutkhawm neih a ni

Serchhip Road Protection Squad chu nimin khan an Chairman leh District Bawrhsap Paul L. Khuma hova thukhawmin hmalakna tur hrang hrang an sawiho.

Vantlang kawng te hi mipuiin tangkai taka an hman tura siam a nih avangin mipuite an himna tur leh Traffic Jam te a awm lohna turin lirthei veivak te tibuai lo zawng leh mihring ke-a kalna tura siam Pavement-ah te harsatna awm lova ke-a kalte an veivah theihna turin sawrkar chuan dan a siam a. Kawngpui hne-a lirthei leh bungraw dang dahte khap a nih bakah kawngpui tichhe zawng leh tihnawk zawnga khawsak te, mahni ram neih bak pela kawngpui hnaih taka Insak te khap tlat a ni a. Heng danin a khap te bawhchhia an awm leh awm loh enfiah turin Serchhip District Road Protection Squad te hi din an ni a. Hun bi siamin Serchhip khawpui chhunga Veng tinah kal kualin an endik thin a. Road Protection Squad ten Inspection an neih hnuhnung ber hi May 7, 2024 kha a ni.

Nimin-a thutkhawm ah hian Inspection Team te report hi ngaihthlak niin VC area hrang hranga kawngsira Motor Park te, phalna nei lova bungraw dah te, Electric ban sawn ngai leh thildang te sawiho a ni a. Heng zinga a tam zawk hian Inspection Squad te ngenna ngai pawimawhin an insenghawi tawh a, amaherawchu dan zawm lo an la awm tih tarlan a ni a. Heng bakah hian kawngsir-a motor sil chungchang te, School nau-pang hruai te avanga Traffic jam leh Public Transport te dinna hmun mumal lo te pawh sawiho a ni.

Serchhip District Road Protection Squad chu Member inruat belhin Team thumah then ni se, Inspection hnuhnung bera an hmalak tawhna te bawhzui pahin endik tur thar lo awm te nen khawpui chhung veng hrang hrangte a hma thei ang bera fanchhuah leh ni se an ti a. Vantlang kawng chungchanga sawkarin dan a siam te mipuiin an zawm theihna turin District Magistrate in mipui te hnena hriattirna chhuah ni se an ti bawk.