Serchhip District-a QRT te training zofel ta

Tunkar Thawhtanni atanga neih Serchhip District-a Quick Response Team (QRT) te tana Training chu nimin khan zawhfel a ni.
Serchhip DC Conference Hall-a QRT Training kharna hun hman hi Serchhip District Bawrhsap Paul L Khuma chuan hmanpuiin he training hi a hun bi pangngai ang ni lovin Addl. DC Lalrinzuala leh DM&R leh Sports & Youth Services Department te thahnemngaihna avanga a bika neih a ni tih a sawi a. He training a hlawhtlin theihna tura ngaihtuahna leh tha leh zung sengtu zawng zawng te chungah lawmthu sawiin, kan hma huna chhiatna thleng thei tumahin kan sawi lawk thei lo a, chhiatna a lo thleng a nih chuan QRT te chu District mipuite tan an mawhphurhna theihtawpa hlenchhuak turin a sawm a. Hmanrua an neih loh dan te a hriatpui thu leh a tul anga ngaihtuah zel a nih tur thu a sawi bawk.

QRT Training hi September ni 2, 2024 khan neih tan niin DM&R leh Sports & Youth Services Department atangin Trainer mi 3 in chawlhkar khat chhung an awmchilh a. Serchhip a QRT-a tel mi 14 zinga mi 11 ten Training hi neiin Leisekawt Field, DC Office Complex chhung leh hmun hrang hrangah training hi an nei a ni. An training chhung hian chhanchhuahna hmanrua chi hrang hrang hman dan te, kham-a inchhanchhuah dan te, Pulley hmanga inhnuhchhuah dan te, Kham leh Inchung sanga inpawhchhoh dan te, Strecher siam leh hman dan te, Building sang tak atanga damlo lakchhuah dan te, hmun khirh tak tak atanga chhanchhuah ngai te chhanchhuah dan te, Mizorama hman tangkai tur ang chi zawng zawng kim takin an zir a ni.