Serchhip District-a Swachhata Hi Seva Campaign 2024 kalpui dan tur ruahmanna siam a ni
Serchhip District chhunga faina beihpui thlakna, Swachhata Hi Seva Campaign, 2024 kalpui dan tur ngaihtuaha District Steering Committe thutkhawm Serchhip DC Meeting Hall-a neih hian kumtin-a neih thin Swachhata Hi Seva Campaign hi kumin hian kum dang zawng aia uar lehzualin, mipui mimir a tam thei ang ber an tel theihna turin ruahmanna an siam a. He Faina beihpui hian a tum ber chu kan ram, kan khua leh veng te a lo fai lehzual theih nana mipui hnena faina chungchang inzirtir te, Faina kawnga a tam thei ang ber thawkchhuak tura hmalak te, hmun bal zual zawng chhuak a tihfai hnatlang neih bakah Sanitary Workers te hlutzia kan hriat theih nana chawimawi te a ni a. Kumin 2024 Swachhta Hi Seva Campaign hnuaiah hian sawrkar laipui chuan banpui pathum - Swachhata Ki Bhaagidari (Cleanliness Participation), Sampoorna Swachhata (Complete Cleanliness) including Swachhata Lakshit Ekayi (Cleanliness Target Unit) leh Safai Mitra Suraksha Shivir( Sanitary Workers Shivir) te a duang a ni.
District Steering Committee thukhawm hian Serchhip District a hmalakna tur hrang hrang duangin, Swachhata Hi Seva Campaign hi September ni 14 atanga October ni 1 thleng kalpui tura ruahman a ni a, September 14 hi Sawrkar Pisa chawlh a nih avangin September 17-ah a hawnna hun hman relin Thupui atan ‘Swabhav Swachhata - Sanskaar Swachhata' tih hman a ni anga. A hawnna program hi Serchhip Town-ah leh Civil Sub-Division hrang hrangah neih tur niin a kharna inkhawm chu October 2-ah neih tur a ni a, Veng leh khaw fai lawmman te leh inelna hranga thate hnena lawmman semna hun hman tur a ni ang.
He Meeting hian hmalakna tur hrang hrang duang chhuakin Veng leh khaw chhunga bal zual bik, Black Spot/Cleanliness Target Unit (CTU) te chu VC te, Sanitation Committee te leh WATSAN Committee ten September 9, 2024 hmaa zawngchhuakin, heng CTU te hi tihfai hnatlang neih tur a ni anga. Faina hnatlang hi VC Area tinah neih tur niin Veng fai/khawfai inelna buatsaih a ni dawn bawk a ni. Hei bakah hian Sanitary Workers te tan bik a thlawna inentirna, Health Camp chu khaw hrang hrangah Health Department ten an buatsaih dawn a. Serchhip khawpuiah chuan DC Office tual zawl-ah buatsaih tur a ni anga, Middle School leh Higher Secondary School te tan Essay, Painting leh bawlhhlawh atanga thil siam, Waste to Art-ah te inelna buatsaih a ni anga. College kallai te tan Reels insiamsiak leh Waste to Art a inelna buatsaih tum a ni bawk. Swachhata Hi Seva Campaign pual hian Faina lama hmalatu langsar, hlawh phut hauh lova tlawmngaihna avang liau liaua mahni Veng leh khua tifai thin, Swachhta Warriors te chawimawina hun hman a ni dawn bawk a ni.
Comments
Post a Comment