Serchhip District Bawrhsap in faina beihpui thlakna, Swachhata Hi Seva Campaign a hawng

India ram faina beihpui - Swachh Bharat Mission hmalakna peng pakhat leh India hnampa Mahatma Gandhi piancham 150-na lawmna ni pahfawma Serchhip District-a faina beihpui thlakna, Swachhata Hi Seva Campaign chu nimin khan hman tan niin Serchhip-ah pawh Bawrhsap Paul L. Khuma kaihhruaiin he Campaign hawnna hi neih a ni.

Serchhip DC Conference Hall-a Swachhata Hi Seva Campaign hawnna hunah hian Bawrhsap Paul L. Khuma chuan Swachhata Hi Seva Campaign awmzia sawifiahin, faina atana mipui te inpekna pawimawhzia a sawi a. Faina hi a taka kan nunpui a, kan nitin khawsak phungah a beh tlat a tul thu a sawi a. ‘Ram bal leh tawp, rimchhia leh tenawm’ tih chu ramdang mi ten India ram an hmuh thin dan a ni tih sawiin, chu chu thlak danglam tumin Prime Minister Narendra Modi chuan nasa takin a bei a, ram pumah faina beihpui kawng hrang hrangin kalpui reng a ni, a ti a. India Hnampa Mahatma Gandhi chu a naupanlai atangin a nu in Faina pawimawh zia a zirtir thin tih sawiin, chutiang bawkin Serchhip District a nu leh pa te pawhin an fate chu naupangte an nih lai atangin fai an zirtir a pawimawh thu a sawi bawk a ni.

Bawrhsap chuan Khua, Veng leh District fai nei tur chuan thawhhona a pawimawh thu pawh sawiin, Sawrkar chuan faina beihpui thlakin nasa takin tan la mahse mipui mimir in nunphunga kan neih loh chuan awmzia a nei dawn lo tih a sawi a. “Khawtlang hruaitute, tlawmngai pawl te leh Kohhran hoten mipui te thinlungah faina kan tuh a ngai a; chutianga kan inzirtira, kan rilru-a kan tuh ngheh loh chuan kan hmalakna te hi a hlawhchham dawn a ni,” tiin he huna kalkhawm te chu mahni theuhah faina bul tan a, midangte zirtir chhawngtu ni turin a sawm bawk a ni.

Swachhata Hi Seva Campaign hi India ram faina beihpui - Swachh Bharat Mission hmalakna peng pakhat leh India hnampa Mahatma Gandhi piancham vawi 150-na lawmna ni pahfawma neih a ni a. Swachhata Hi Seva Campaign in a tum ber chu mipui nawlpui faina hmalakna a tel tir a, faina chu mitin mawhphurhna a siam a ni.

Swachh Bharat Mission hi India ramah kum 10 chhung kalpui ni tawhin Swachhata Hi Seva erawh kum 7 kalpui a ni tawh a, kumin Swachhata Hi Seva ah hian Serchhip DC hovin Programme hrang hrang neih tur duanchhuah a ni a. Nimin khan a hawnna hun hmangin hemi zawh veleh Faina Kawngzawh, Cleanliness Rally neih chhunzawm nghal a ni a. Serchhip District Bawrhsap chuan he Rally hi vailiamin DC tualzawl atangin IOC Kawn thleng kalkhawm ten kawng an zawh a, kawng dung tluanin bawlhhlawh te an chharfai nghal bawk a ni.

Swachhata Hi Seva hi October ni 2 thleng hman tur niin hemi hun chhung hian VC huap faina hnatlang, Blackspot (hmunbal) tihfai, Kan tui tlan hnar leh chhehvel tihfai, School leh Office hmunhma tihfai, Zirlaite tan inelna hrang hrang buatsaih, Waste to Art Exhibition te neih tum a ni a. Lawmman hrang hrang VC Area fai ber, hnatlanga thawkchhuak tam ber, thingtlang khaw fai ber inelna te buatsaih a ni a. Sanitation a thawktute tan a thlawna inentirna hawn a ni bawk ang.

Serchhip District hian nikum 2023 khan Mizoram-a District khawpui fai inelna ah pakhatna dinhmun a luah a. India rampum inelna Swachh Survekshan 2022-ah khan North East Zone-a mipui atanga Feedback hmu tha ber lawmman chu Ser-chhip ULB ten an dawng a. SBM (G)-ah July 26, 2027 khan Serchhip District hi Open Defecation Free (ODF)-ah puan niin July ni 20, 2022 khan ODF Plus District-ah puan leh a ni a. East Lungdar RD Block chu Mizoram puma ODF Plus ni thei hmasa ber niin SBM (U)-ah pawh Serchhip Town hian December ni 31, 2017 khan ODF nihna hi a lo dawng tawh bawk a ni.