Mi tam tak eizawnna, Mizoram Handloom hian hma a sawn zel a ngai - Chief Minister

Chief Minister Lalduhoma chuan mi tam tak eizawnna, Mizoram Handloom chuan hma a sawn zel a ngai tih sawiin, sawrkar lama thawktute pawhin nasa lehzuala ke an pen a ngai tih a sawi.
Chief Minister hian nimin khan a Bial chhung Thenzawl khua a Mizoram Handloom Export Facilitation Hub-ah ‘IOT Device Deployment in the state of Mizoram’ chu hawngin he thu hi a sawi a, “Kalphung tharah Project kawng bo awm lovin, a hmang tangkai tur te hnen thleng ngei zelin hna kan thawk tur a ni. State dang kan an lohna tam tak a awm a, Project ziaktute pawhin hei hi hriaa, kan hnam leh kan mite mila project ziah thiam a pawimawh,” a ti a, ZOHANDCO pawh tih chak zel a tul thu leh NEHHDC leh Agency dang kan tana tangkai turte kuangkuah chungin an kal zel dawn tih a sawi a ni.

Chief Minister chuan Thenzawl leh a chhehvela puantahtute chuan puantahin ei an zawng a ni satliah lo tih sawiin, “An puantah ah hian kan culture leh kan nihphung an tah tel a, kan Hnam tihphung anga puan an tahna ah Technology tha zawk a rawn inrawlh lut thei hi a ropui a ni. Kawng thui tak kal tur erawh kan la nei. Kan mamawh ang taka duan Yarn Bank te kan la mamawh a. Yarn tha ber chi kan tah theih te a tha hle,” a ti a. “Kan thalaite Fashion Designing=ah an sang viau a, lehkhathiam thalai rualte nen tangho in Export lam tih dan te zir ni ta sela, Weavers te tan hian Designer tha tak tak awm bawk sela, Puan ang chauh ni lo deuh a, product dang tam tak nen khawvel Market kan hmachhawn theih hun tur hi ka nghakhlel a ni,”a ti a. Weaver te pawh Natural Yarn- Silk leh Cotton tahchhuah lamah hmasawn sawn tumt ura chahin, “Sericulture Department nen tangkawpin Silk Product pawh nasa zawk kan siam chhuak thei ngei tur a ni,” tiin official leh puantahtute a chah a ni.

He hunah hian Industries Minister F. Rodingliana pawhin Mizoram hian Industrial Policy tha tak kan nei tih sawiin, “Chutah chuan Subsidy Scheme tha tak tak a awm. Heng kan Scheme neih te hi Industry neituten rawn hmang tangkai turin ka sawm che u a. Cluster Development ang zawnga hmalak uar deuh deuh te hi kan tum a ni,” a ti. Mizote hi hnam mawl kan nih lohzia chu Puan nalh tak tak tah thiam kan nihna hian a tifiah tih Minister chuan sawiin, “He thiamna ril leh hlu tak hi kan vawn that a, kan uar zel a ngai a ni,” a ti a. Industry sawi a pianga rilrua lang nghal chu Power Supply a nih thu pawh sawiin, Power lama hmalakna hi kan tluan chuan kumin kum tawp lamah hna kan tan thei hial mai thei tih a sawi bawk.

IOT Device Deployment in the State of Mizoram hawnna hun hi Commerce & Industry changtu Secretary Dr. Lalzirmawia Chhangte IAS chuan kaihruaiin Neeraj Kumar, Manager, NEHHDC chuan an device kalpui chanchin a sawifiah a. Khawvel hmaa India hmarchhak hnam te nunphung leh zia venhimna leh phochhuahna niin Sum leh pai hmuhna hnara hmang chungin heng kan hnamzia leh tihdan te, kan incheina te zau zawka tarlanna a ni a, Internet kaltlanga zawrh chhuahna remchang a siam bawk, a ti.

IOT Device hi internet thiamna hmang tangkaia Puan leituten an puan lei chanchin awlsam taka an hriat theihna tur hmalakna a ni a. An puantah ah QR code a awm ang a, hei hi Scan in a tahtute, a tahna hmun leh thil pawimawh dang awlsam takin a en theih a ni. Sum hi North Eastern Council, MDoNER, Govt. of India atanga sanctioned niin, Project thawktu te hi MDoNER Corporation, North East Handicrafts and Handloom Corporation, Guwahati an ni.