Serchhip-ah hlawk zawka Ar vulh dan inzirtirin Ar note leh Ar chaw te semchhuah a ni
ICAR Mizoram Centre, Kolasib; Serchhip District-a AH & Vety Department leh Serchhip District KVK te tangkawp buatsaih ‘Livelihood Improvement of Tribal Farmer’s through Backyard Poultry Farming cum Input Distribution’ hi AH&Vety Conference Hall-ah neih a ni a, Serchhip DVO Dr. H. Vanlalrawna chuan ICAR in hetianga training Serchhip-a an rawn buatsaih leh kuthnathawktute tana tangkai tur Ar note, Ar chaw leh tui pekna leh Ar damdawi chi hrang hrang hmanga hma an rawn la chu lawmawm a tih thu sawiin, India ram chu Artui tharchhuah kawngah khawvel ah 3-na a nih thu a sawi a, hemi tihlawhtlingtu te chu sawrkar leh kuthnathawktute an nih thu a sawi bawk.
He hunah hian KVK Serchhip District-a Senior Scientist & Head Dr. T. Vanlalngurzauva chuan ICAR hmalaknaa kuthnathawktute tan hun an buatsaih thei chu lawmawm a tih thu sawiin, tangkai tak leh hlawk taka kuthnathawktuten an hman ngei a beisei thu a sawi a, kuthnathawktute tana KVK hmalakna hrang hrang a sawi bawk a. ICAR Kolasib-a Senior Scientist Dr. Blessa Sailo chuan Tribal Sub Plan (TSP) hnuaia kuthnathawktute tana hmalakna hrang hrang te sawiin, Ei leh bar a kan intodelh theihna kawnga ICAR Research Complex for NEH Region, Mizoram Centre, Kolasib hmalakna hrang hrang a sawi bawk a ni.
Nimin-a he hun hman ah hian North Vanlaiphai leh Serchhip atangin kuthnathawktu mi 50 te hnenah an mamawh chi hrang hrang Ar note, Ar chaw, Ar chaw leh tui pekna leh Ar damdawi chi hrang hrang semchhuah a ni a, Dr. Biaklianzuali, Senior Veterinary Officer, AH&Vety., Serchhip chuan, hlawk taka Ar chi tha chi (Rainbow Rooster) an vulh dan zirtirin, hrisel zawk leh hlawkzawka Ar leh ran kan vulh theih nana mithiam Vety Doctor te rawn thiam a pawimawhzia a sawi a. Dr. C. Lalremruata, Subject Matter Specialist (Animal Science), KVK Serchhip hnen atangin hrisel leh hlawkzawka ar enkawl dan niin Dr. Lalruatfela Sailo, Animal Husbandry Manager (AHM), FOCUS leh Dr. H.Vanlalhruaii te hovin Technical Session neih a ni bawk.
Comments
Post a Comment