Serchhip District-ah ASF in ziaawm lam a pan mek

Serchhip District-a African Swine Fever (ASF) hri leng chu a zia ve hret hret zel niin a lang a, nimin khan Vawk thi 2 chhinchhiah leh a ni.

AH & Vety Department ten an chhinchhiahna atanga a lan danin nimin khan Serchhip District-ah ASF vanga Vawk thi pahnih chhinchhiah niin Thenzawl leh Serchhip Dinthar-ah pakhat ve ve te an ni a, Inrinni khan Vawk thi 20 chhinchhiah ni bawkin heng zinga 10 chu New Serchhip North-ah niin Chhiahtlang-ah 6, Khumtung-ah 3 leh Keitum khua ah pakhat te an ni.

Serchhip District-ah hian nimin khan Vawk suat 17 chhinchhiah niin New Serchhip North-ah 11 leh Thenzawl-ah 6 te an ni a, Inrinni khan Chhiah-tlang-ah Vawk 4 suat niin Khungtung, New Ser-chhip South leh Serchhip Dinthar-ah pahnih theuh suat an ni.

Heti hian kumin chhungin Serchhip District-ah nimin thleng khan ASF vanga Vawk thi 3148 awmin Vawk 6317 suat a ni tawh bawk a, ASF vanga Vawk chan zawng zawng 9465 a tling tawh a, khaw 31-a chhungkaw 1947 in ASF avang hian harsatna tawk tawhin ASF hri hmuhna khaw tam zawkah chuan hun engemaw chen Vawk thi leh suat a awm tawh lo a, hri leng hi darh zau zel lovin a ziaawm hret hret niin a lang a ni.