Retheite ngaihsaktu party kan nihna Ration Card kan thlanna ah lantir kan tum - Supply Minister

Food Civil Supply & Consumer Affairs Minister B. Lalchhanzova chuan retheite ngaihsaktu party an nihna chu Ration Card an thlanna hmanga lantir an tum thu sawiin, “Ngaihsaktu nei ve loten ZPM rei tak atanga min lo nghahna chhanna tur a ni,” a ti.

ZPM party in nimin-a Aizawl-a an Party Office-a Chhung Inkhawm an neih ah Supply Minister B. Lalchhanzova chuan Ration Card chungchanga hma an lakna kal mek sawiin, Aizawl khawpui chhungah Card Var nei si, mirethei tak tak an awm avangin Food Security Committee kaltlangin endik hna kalpui mek a nih thu a sawi a, “Kan tum ber chu mi awm theite leh mahni khamkhawp buhfai ei theite buaipui lam ni lovin mirethei, sawipuitu nei lo, an chanvo tur ang chang pha lo te hmaih palh an awm ang tih kan hlau a, chu chu kan thupui ber a ni,” a ti a. Tunah hian Aizawl-a Veng 83-ah Retailer 153 awmin, Food Security Committee-ten zirchiangin “Keinin DCSO kaltlangin Food Security Committee-te an dik tawk em tih kan lo zirchiang leh dawn a ni,” a ti a. ‘Mi rethei hlamchhiah an awm em?’ tih chu an thupui ber a ni dawn tih sawiin, “A titha lo Veng an awm em tihte thlengin kan lo enfiah dawn a, a teh dan tur pawh ka duangfel vek tawh a ni. A titha lo Veng leh titha Veng te pawh kan puang hial mai thei a ni. Rethei ngaihsaktu party kan nihna hi he Ration Card kan thlanna hmang hian lantir kan tum a, ngaihsaktu nei ve lo ten ZPM rei tak atanga min lo nghahna chhanna tur a ni,” a ti bawk. Supply Minister chuan Retailer lawman te pawh paise 50 atangin Rs.1.50-ah an tisang dawn tih sawiin, “Aizawl bikah chuan hei hi October atangin tan hman kan tum. Retailer ten an buk dik tur a ni a, buk dik zalenna ram nih kan tum,” a ti bawk.

India ram sawrkarin kum 2011 chhiarna angin Mizoram-a chhungkua 7,06,296 te Food Security hnuaiah min rinlut tih Supply Minister chuan sawiin, “Hun hmasa lama National Food Security Committee an din tawh pakhatmah ti danglam lovin hma kan la mek a, chuta buaipuitu tam ber 90% chuang chu MNF Local Council-te an ni. Mi tam tak chuan Local Council thlan a nih hnuah te ennnawn chauh awm an ti hlawm. Mahse kalphung tharah chuan MNF Local Council pawh nise kan ring ngam a, an harh thar ve turah pawh kan ngai. Mizoram mipuite hnena kan sawi duh chu Card Eng nei tur chu mirethei bakberh kan tih ang te kha an ni ber a, Card Pawl chu dinhmun harsa, rethei kan tihte kha niin BPL aia chung dinhmun harsa tak tak si, mahni chhungkaw kham khawp leina tur harsat te an ni,” a ti a Tunah hian Chief Minister hmalaknain Non-NFSA hnuaia kan luh belh theih nan Union Minister pawh an hmuh tawh thu leh ‘Min lo nghak ru’ a tih angina beiseina sang tak an neih thu a sawi bawk.

Mualkhang Botling Plant pawh theih-tawpin hma an la mek tih Supply Minister chuan sawiin, “A hungna tur atan cheng vbc. 23 Tender chhuah a ni tawh a, IOCL lamin Land Development atan Tender chhuah leh thuai an tum a, IOCL Oil Depot pawh chak taka hmalak chhoh niin HPCL pawhin Oil Depot turin Vairengte lamah chetlak an tum mek bawk a, a hlawhtlinna kan hmuh chhoh thuai kan ring  a ni,” a ti bawk.

B. Lalchhanzova chuan Party sawrkar an ni lo tih sawiin, “A lawmawm ber mai chu kan inti neitu em em vek mai hi a ni a, hei hi ZPM Party kan danglamna bik a ni. Mitin huap kan nih dawn avanga Vawiin dinhmun thlenga sawrkarna chang thei kan ni,” a ti a, “Vawiinah hian Minister leh MLA ten kan ti dik lo a nih chuan Party Worker-te pawh hian kan lawm loh zawng sawi hlauh vanga min fak a ngai lo, chu chu kan sawrkar mizia atana ka duh a ni. Sawrkar tawhte tihsual lian tak chu an sawrkar chhungin an inhmuchhuak hman lo thin kha a ni a, an harhchhuak hman lo zel. Tlak tawh hnua mipuite hnena ngaihdam dil reng mai hi kan kalphung tur a ni lo,” a ti bawk.