Sawrkar in a tih tur a tih loh vang niin MNF in an sawi

MNF Party chuan Samagra Zirtirtuten thla thum (3) lai mai hlawh an lak theih loh chhan chu thla nga (5) chhung sawrkar in a tih tur a tih loh vang niin an sawi.

Nimin-a thuchhuah an siamah MNF Party chuan Samagra Zirtirtuten thla thum lai hlawh an la thei lo chu pawi an tih thu leh Zirtirtu rim taka Zirtir hnathawkten hei chen chen an thawh hlawh an la thei lo leh Teachers Day hial boycott an tum chu pawi an tiin lungchhiat-thlak an tih thu an sawi a. Education Minister in ‘Thla 5 chhung Central-in kan sum dawn tur min pek loh vang’ tih a sawi chu a dik tih sawiin, “Thla 5 chhung Central-in kan sum dawn tur min pek loh chhan hi Mizoram sawrkar-in a tih ve tur thla 5 chhung a tih loh vang a ni,” an ti a. “Mizoram sawrkar-in Teachers Education Allocation leh thil dang tul tih tur ang a tihfel har avangin Zirtirtute hian hlawh la thei lo a ni. Sawrkar inthlahdah vang leh dapchawp lutuka an kal vang liau liaua Zirtirtute tawrhna lo thleng hi a pawi kan ti hle,” an ti bawk.