SASCI hnuaia Scheme kalpui dan tur sawihona nei

Land Revenue & Settlement Department chuan Special Assistance to States for Capital Investment (SASCI) hnuaia Scheme kalpui dan tur zirhona hun nimin khan Aijal Club Conference Hall-ah an nei a, he hun hi Revenue Minister B. Lalchhanzova chuan hmanpuiin Revenue Department hnuaia Officer zawng zawngte an tel a ni.

He zirhona hunah hian Revenue Minister chuan Revenue hnuaia dan leh inkaihhruaina chi hrang hrangte chu mipuite tana awlsamna thlentu leh an banphak-a chhawpchhuah a nih theihnan a tul anga siamrem a tul thu a sawi a. Dan awmsa kan hman mekte chu khawilaiah hian nge siamthat zeuha mipuite tana phurrit a chhawk zangkhai theih ang tih ngaihtuah reng a tul thu leh Revenue lamah mithiam bik an nih avangin an thiamnate hmang tangkaia ngaihtuahna seng turin a chah a, Mizoram thanna leh than lohnaah mawhphurtu an ni satliah lova, a innghahna lungphum pawimawh tak an ni tih inhre reng turin a chah a ni.

Revenue Minister chuan Revenue Department hnuaia Officerte chu tum (target) neia thawk turin a chah a, hunbi tiam neia hmachhawp siam tura chahin, a tul anga vil reng an tum thu a sawi bawk a. Sawrkarin dan kaltlanga mawh-phurhna a pekte chu phurrita ngai lo tura chahin an thawh parzu mipuiten an tlan theih tura insangmar reng turin a fuih a, an hun chhunga hnuhma tha hnutchhiah tum turin a chah bawk.

Nimin-a he zirhona hunah hian Digital India Land Records Modernisation Programme (DILRMP) chungchang te; e-ram chungchang te; Generation of Unique Land Parcel Identification Number (ULPIN)chungchang te; SASCI, DILRMP leh SVAMITA (Survey of Villages and Mapping with Improvised Technology in Village Areas) chungchang te zirho niin chawhnu lamah an Department hmalakna hrang hrangte an sawiho nghal bawk a ni.