Ek leh zun thli sawngbawlna tur Project khuhhawng

Aizawl khawpui chhung Zone-7 huamchhung a Veng 11-a Ek leh Zun thli mumal taka sawng-bawlna tur project, 'Small Bore Sewerage & Septage Treatment for Aizawl Zone -7' kalpui tur chu khuhhawnna chu nimin khan neih niin UD&PA Department changtu Minister K. Sapdanga chuan a hmanpui a ni.

Taxation Auditorium-a he hun hmanna ah hian UD&PA Minister chuan Small Bore Sewerage & Septage Treatment for Aizawl Zone 7 chu Project pawimawh tak, hriselna khawih leh chona nasa tak kengtel a nih thu sawiin, project phurawm tak a nih avangin a thatna leh a tumte mipui hnena puanzar kawngah tanlak pawh a tul hle dawn tih a sawi.

Master Plan for Aizawl Vision-2030 siam ah Aizawl khawpui chu Zone 9-ah then niin, Zone 6-ah he project hi SIPMIU in an kalpui tawh a. Tunah hian Zone 7 hnuaia Local Council 11- Dawrpui, Chawnpui, Tuikual North, Tuikual South, Dinthar, Dawrpul Vengthar, Vaivakawn, Kanan, Khatla, Mission Veng leh  Zarkawt-ah te kalpui tur niin NGT zirchiannaah Aizawl tuilakna, Tlawng lui pawhtu Tuikual lui leh a pawhtu luikawrte tih thianghlim a tul avangin hmalak lehna hmasa atan Zone-7 hi thlan a ni. 

He huna tarlan a nih dan chuan UD&PA hnuaia AMRUT 2.0 Scheme kaltlangin PHE in Water Supply leh Sanitation atan cheng vbc. 145 vel a hmu a. Heng zinga cheng vbc. 105.86 chu khaw 19-a tuilakna atana ruahman niin thawh chhoh mek a ni a, cheng vbc. 39 chu Sanitation atan ruahman a ni a, First Installment cheng vbc. 29 dawn tawh a ni.

Small Bore Sewerage & Septage Treatment for Aizawl Zone 7 Project hi cheng vbc. 38 bawr vel senga thawh tum niin, kum 2 chhunga zawhfel tum a ni a, Company-in a enkawl hna kum 3 chhung an thawk zui ang.