Khawchhak unaute duhsak thar hriatthiam har ti

Mizoram Pradesh Congress Committee (MPCC) President Lal Thanzara chuan Chief Minister in khawchhak unaute a duhsak thar ta viau chu hriatthiam har an ti tih a sawi.

Congress Party in nimin-a Aizawl Congress Bhavan-a Friday Political Session an neih ah MPCC President Lal Thanzara chuan, “Kan CM in khawchhak unaute a duhsak thar ta em em mai hi hriatthiam har kan ti a, chutihlai chuan kan unau Zampui tlangdunga awm te chu Ration Card atangin a paih leh si a, hei hi 'Bana kaih' Policy chu em ni? Kan Unau Zampui tlangdung-a awm te khuan hei hi mak an ti a, hei hi em ni Kalphung Thar chu an ti a ni. Hmangaihna mak tak chu a lo ni!,” a ti. MNF chungchang pawh sawiin MPCC President chuan, “Sweetzerland of the East min tiamtu te min thlenpui chu kan hria a, Bangladesh of the South-ah min dah zawk a, MNF hi kan hotuten i thawhpui tawh lovang u an ti a ni,” a ti bawk.

MPCC Vice President C. Ngunlianchunga pawhin sawrkar chungchang sawiin, “Thlai thar kan lei dawn an ti a, an sawrkar ta a. MNF in SEDP First Installment an sem bang vbc. 150-ah Health Care ah vbc. 40 an dah a, vbc. 110 chu thlea thar lei nan an 'DAH' a, mahse Hmunphiah an lei leh ta chuang lova. A sawi hi chu an sawi mai a, mahse a taka chet hi an ti hleithei lo,” a ti bawk.