Rural Self Employment Training Institute hawng

Health Minister Lalrinpuii chuan nimin khan Lungleia District-a RSETI hmasa ber leh Mizoram-a a pathumna tur chu Govt. J. Buana College Campus-ah a hawng.

Sawrkar Laipui Ministry of Rural Development hnuaia thingtlang thalaite'n mahni kutkawiha eizawnna an neih theihna tura thiamthil zirtirna hmun, Rural Self Employment Training Institute (RSETI) ruahmanna kaltlanga Lunglei District-a RSETI hmasa ber leh Mizoram-a a pathumna, HDFC Bank-in India rama RSETI an kalpui hmasak ber tur ni bawk hawnna hunah hian Health Minister chuan HDFC Bank-in Lunglei-ah thalaite thiamthil zirtirna atana RSETI bul an tan chho chu lawmawm a tih thu leh thalaite'n training tha tak piah lama an bultanna tur sum ngaihtuahpui thei tur Bank nena inkungkaihna an nei lehzel tur chu lawmawm lehzual a tih thu a sawi a. HDFC-RSETI atana an mamawh pindan leh hmanraw dangte hmantirtu Govt. J. Buana College thuneitute chungah lawmthu a sawi bawk.

He hunah hian khual zahawm Lunglei District Bawrhsap R. Lalthazuala pawhin thu a sawi bakah HDFC Bank Mizoram Cluster Head John Varte chuan lawmthu a sawi a, Lunglei-a HDFC-RSETI chu India rama RSETI tha ber pawla dinchhuah an tum dawn tih a sawi a. Lunglei District mipuite tana an luanchhuah zel theih nan mipuite thawhpuina an mamawh tih a sawi bawk.

Ministry of Rural Development chuan India ramchhunga Bank awm zawng zawngte chu RSETI kaltlanga thalai hna nei lo te hnenah mahni kutkawiha eizawnna neia an intodelh theihna tura zirtir a, kawng kawhhmuh turin a ti a. Hemi bawhzui hian thingtlang khuaa hnathawh tur nei lo te awm tamna hmun 598 laiah Bank hrang hrang kaltlangin RSETI hi din a ni tawh a, Lunglei-a HDFC-RSETI hi a hnuhnung ber leh naupang ber a ni.

HDFC-RSETI Lunglei-ah hian Trade pathum - Puanthui (Tailoring), Beauty Parlour Management leh Computer Hardware & Networking zirna te kalpui niin, zirlai 98 an awm mek a. Zirlai zawng zawngte hi an hmanraw mamawh - Uniform, Hostel/Boarding chenna tur leh ei in leh an zirna senso man chawi lovin a thlawn veka zirtir an ni.

HDFC Bank hi India rama Private Sector Bank lian ber leh khawvel a Private Sector Bank lian ber 5-na niin, rampumah Social Responsibility leh Skills Development Programme 182 vel a kalpui mek a. Mizoram a District pasarih-ah Branch 11 an nei mek a ni. HDFC Bank hian Corporate Social Responsibility (CSR) kaltlangin June ni 16, 2020 khan Civil Hospital Lunglei-ah cheng nuai 40 man Medical Equipment an lo pe tawh bawk a ni.