‘Legislative Forum on HIV/AIDS’ din thar leh tum

Health Minister Lalrinpuii chuan Mizoram MLA ten HIV/ AIDS darh zel tur venna atana tha an thawh ve theihna, ‘Legislative Forum on HIV/AIDS’ chu din thar leh turin hmalak mek a ni, a ti.

HIV leh a kaihhnawih dona atana inzirtirna hrang hrang beihpui thlakna ‘Intensified IEC Campaign - India Fight Against HIV & STI’ hawnna Lunglei District tana nimin-a buatsaih a hmanpuina ah Health Minister chuan Legislative Forum on HIV/AIDS din thar lehna atan Mizoram Legislative Assembly Speaker hnenah dil mek a nih thu a sawi a, Mizoram chu ruihhlo in a run mek tih sawiin, ruihhlo chuan mahni nun inthlahdahna a thlen thu leh chu chuan natna tha lo - HIV leh STI-te a tipung chak hle a ni, a ti.

Health Minister sawi danin, Mizoram a HIV leh STI pung chak lutuk chuan thuneitute leh a thawktute mang a ti ang takzet a, HIV/AIDS do turin Mizoram Sawrkar chuan ‘State Council on AIDS’ te tuaithar lehin, he natna pung darh zel tur veng tur hian mitin in nun uluk a, ruihhlo laka inven fimkhur leh kawppui thlan fimkhur chu thil pawimawh tak a nih thu a sawi bawk.

Health Minister Lalrinpuii chuan Intensified IEC Campaign hlawhtlinna tur chu mipuite-ah a innghah thu leh Health Department-a thawkte mai bakah District Administration lam te, sawrkar hna thawk, sikul naupang, Kohhran leh tlawmngai pawl ten tanrualna an neih a pawimawh thu a sawi a, Intensified IEC Campaign-in a tum ber - Mipui zawng zawng hnen thleng phak HIV leh STI natna dona kawnga inzirtirna thehdarh chu a hlawhtlin ngei theih nan theihtawp chhuah theuh turin hmalatute chu a chah bawk.