Rampum-a Nurse hna thawk tha chawimawina Serchhip nu hnenah President in a hlan

India ram-a Nurse hna thawk tha te chawimawina sang ‘National Florence Nightingale Award’ chu nimin khan mi 15 hnenah hlan niin chawimawina dawngtute zingah hian Serchhip atangin District Hospital Serchhip-a thawk H. Mankimi chu a tel a ni.
India ram State hrang hrang atanga National Florence Nightingale Award, 2024 dawng tura thlanchhuah mi 15 te hnenah hian President Droupadi Murmu chuan nimin khan chawimawina hi a hlan a, New Delhi-a Rashtrapati Bhavan-a Ganatantra Mandap-ah he chawimawina hi hlan niin India ram State hrang hrang atanga Civil mi 14 leh Army pakhat-te hnenah President chuan he chawimawina hi a hlan a, heng zingah hian District Hospital Serchhip-a Ward Superintendent (Rtd) H. Mankimi w/o R. Sanghmingthanga, Serchhip IOC Veng chu a tel a ni.

H. Mankimi hian kum 1986 khan GNM Durtlang Hospital atangin Nurse hna a zir zo a, Durtlang Hospital-ah hian kum thum (3) thawk zuiin September 7, 1991 khan sawrkar-ah a lut a, nikum (2023) March 5 khan Ward Superintendent-ah kumin March thla tawp khan Ward Superintendent atang hian Superanuation Pension in a chhuak a. Nurse hna a thawh chhung hian hmun hrang hrangah thawkin Maternity Ward (Nau neihna Ward)-ah hun tam tak a hmang a, hnathawh thiam tak niin a hnathawh that avangin he chawimawina hi a dawng a ni.

He chawimawina hi kum 35 Nurse hna thawk tling tawh, Staff Nurse an nihna anga hnathawk tha leh Hmeichhia te hriselna kawnga thawhhlawk te hnena hlan thin a ni a, kum 2007 atanga khan he Award hi President of India remtihna-in a thlan dan siamthat a ni a, Mizoram atangin kum 2007 leh 2024 inkarah hian mi 12-in National Florence Nightingale Awards hi dawngin he chawimawina hian thuziak, Medal leh Sumfai Rs. 1,00,000/- a keng tel a ni.