Ruihhlo dona kawnga hmalak zel dan tur rel a ni

State Level Ruihhlo do Working Committee chu nimin khan an thukhawm a, hmalak zel dan tur hrang hrangte sawiho a ni.

Secretariat Conference Hall, Aizawl-a State Level Ruihhlo do Working Committee thutkhawm hi an Chairman leh Excise & Narcotics Department Minister Lalnghinglova Hmar chuan kaihruaiin an hnathawh hlawhtlinna te nakum lama teh theih turin kumin Financial Year-ah hian Ruihhlo do dan tur focus bik nei rana rilru siam turin Member te chu a sawm a ni. He thutkhawm ah hian ruihhlo dona tura ruihhlo dotu pawl hrang hrang-a Fund sem sawm dan tur thlirho niin Excise & Narcotics, Police, FDA, Central YMA, MTP, YLA, SWD, MSACS, Mizoram District 11-a sem chhuahte bakah Training, Workshop Meeting leh Mass Media Campaign nan Sawrkar atangin cheng nuai 200 phalsak an nih thu tarlan a ni a. Sum sem chhuah hnuah tangkai taka hman a nih theih nan uluk taka a hman dan tur leh a hman hun turte inkaihruaina felfai tak duan nise an ti.

Working Committee on Ruihhlo do thutkhawm-ah hian Mizoram Social Defence & Rehabilitation Board (MSD&RB), SW&TA Department buatsaih 'Handbook on Ruihhlo do' tih chu tangkai taka hman atan pawm tlan niin a copy siam belh an rel a. Mizoram chhehvela ruihhlo kalkawng zirbing turin Study Team din ni se, District Level Committee on Ruihhlo do-ah Sub-Hqrs. YMA, MTP leh YLA OB atangin Vice Chairman ruat ni se tih a ni bawk.