August thlaa ruahtui tlak tam ber kum thleng

Thla kalta, August 2024-ah khan Mizoram-ah ruahtui mm 572.7 a tla nia chhinchhiah a ni a, kumin anga August thlaa ruahtui tlak tam thla hi a awm ngai lo nia thudawn a ni.

Aizawl-a State Meteorological Centre in an chhinchhiahna atanga a lan danin thla kalta August thla khan ni tin deuhthaw ruah surin ni 5, ni 6 leh ni 29-ah ruah a sur lo a. Ni 7 atanga ni 28 thlengin ni 20 chhung nitin ruah a sur a, ni khat a awl hnuah a tuk atangin a chhunzawm leh nghal bawk a ni. Kumin August thla chhung khan ruahtui mm 572.7 a tla nia chhinchhiah niin State Meteorological Centre-in an chhinchhiah chinah kum 2010 August thlaah khan ruahtui mm 517.9 a tla a, hei hi a hma chuan August thlaa ruah tam ber tum a ni thin a. Kum 2010 August-ah bak kum dang August-ah mm 500 a tling ngai lo a, nikum August thla ah khan mm 427.1 tlain kum 2022 August thlaah mm 277.8, kum 2021 August thla ah mm 353.5 leh kum 2020 August thla ah mm 156.9 a tla a, kumin anga August thlaa ruahtui tlak tam hi chhinchhiahna atanga a lan danin a awm lo a ni. Chhinchhiahna atanga a lan danin August ni 31 thleng khan kumin ah ruahtui mm 1941.7 a tla tawh a, nikum kum tluan khan mm 1972.8 a tla a ni.