MNF Legal Board ten MSCW Chairperson dan lova ruat nia sawiin, bang tura an phut thu an sawi

Mizo National Front (MNF) Legal Board chuan Mizoram State Commission for Women Chairperson, Lalchhandami chu dan lova ruat a nih thu sawiin, bang tura an phut thu an sawi.

Nimin-a Aizawl Press Club-a thuthar thehdarhtute an kawmna ah MNF Legal Board chuan MSCW Act 2004 hnuaia Dan siamah Chairperson atan kum 65 pel tawh chu ruat theih a nih loh thu chiang taka a inziah thu sawiin, kumin March 8 khan Lalchhandami D/o Hranghrima (L), Ramhlun North Biak In Mual, Aizawl chu Mizoram State Commission for Women Chairperson atan hian ruat a nih thu an sawi a. Sawrkar document hrang hrang leh Kohhran Record-ah Lalchhandami hian Chairperson atana ruat a nih hian kum 68-na a hmang mek tawh tih chiang takin a lang tih an sawi a. Lalchhandami hi March ni 31, 2016 khan kum 60 a tlin tawh vangin Research Officer, AH&Vety Department atangin Superannuation pension-in a chhuah thu te; Mizoram Presbyterian Kohhran, Synod-in Baptisma a chan hun record a vawn atanga a lan dan pawhin a pian ni chu 30.3.1956 a nih thu leh kum 2021-a AMC Inthlan ah amah Vote tura sawmna ah kum 63 mi a nih thu tarlan a nih thu te an sawi a ni.

MNF Legal Board chuan MSCW Member 7 zinga mi 3 te an hun la tawp lovin anmahni pawhin banna an thehlut lo chungin kumin August ni 28 khan Notification luahlanin, Member 7 an ruat hnan leh tih pawh an sawi a. Hetianga dan bawhchhia-a MSCW Chairperson ruat mai duh tawk loa, Member dinglaite pawh midang ruat hnan an nihna hi a ruattu, ZPM Sawrkar in an hunbi tiam chhunga sut ve ve turin an ngen a, MNF Legal Board hian September ni 9 tlai dar 5:00 hmaa MSCW Chairperson atanga Lalchhandami ban leh MCSW Member ruatna Notification sut an phut thu sawiin, an beisei anga bawhzuina a awm loh chuan a tawp thlengin hma an lak tur thu an sawi bawk a ni.

MNF Legal Board chuan hetiang thil dik lo langsar tak hi ZPM Sawrkar in tihdik tum lova, Zirlai Pawl leh Assembly House-ah meuh pawh puanchhuah a ni tawh chung pawha, engti kawng maha hma an lak loh vanginloh theih loha ngaiin hma an lak tak thu an sawi a ni.