Hunpui vuakvet-ah halpuah leh halmawi lam chi reng rengte khauh zawka khap a ni dawn

Home Minister K. Sapdanga hova sawrkar mi pawimawh te nimin-a thukhawm chuan Hunpui vuakvet-ah halpuah leh halmawi lam chi reng rengte khauh zawka khap nise an ti.

Kan hma lawka Hunpui lo thleng tura Dan leh thupek kenkawh dan tur chungchang leh halpuah leh halmawi hrang hrangte khap dan tur chungchangah nimin khan Home Minister K. Sapdanga hovin sawrkar mi pawimawh te chu Secretariat Conference Hall-ah an thukhawm a, Home Minister chuan hriselna kawnga nghawng tha lo tak thlentu halpuah leh halmawi hrang hrang ven leh hemi ti lo tura mipui zirtir kawngah tanrual a pawimawh thu sawiin, hemi chungchang sawihona hun kum dang zawng aia hmaa neih a ni chu lawmawm a tih thu leh rah tha a chhuah ngei a beisei thu a sawi a. Dan bawhchhiate laka hremna lekkawh zel chu halpuah leh halmawi hal dona kawnga inzirtirna pawimawh tak a nih thu a sawi bawk.

He hunah hian Chief Secretary Dr. Renu Sharma IAS chuan hmun dangte ngaihtuahin Mizoram boruak chu la thianghlim zawk hle mah se vawnghim zel tura tanlak angai a, nakin zel atan boruak bawlhhlawh zel tur kan ven lawk a ngai a ni, a ti a. A hun taka chetlak a tul thu leh inzirtirna zau zawka kalpui a tul thu sawiin, Sawrkar mai nilo, kan zavaia tanrual a tul dawn thu a sawi bawk.

He Meeting-ah hian hunpui vuakveta dan leh thupek kenkawh chungchangah khauh lehzuala Sawrkar a kal dawn thu tarlan niin, halpuah leh halmawi lam chi reng rengte pawh khauh zawka khap nise an ti a. Mipuite hnena inzirtirna zau zawka kalpui dan turte ruahman niin, halpuah zuar leh halte report zung zungna tur siam leh nise tih a ni a. District tin Magistrate-te chu halpuah leh halmawi lam chi reng rengte khapna thupek chhuah tura hriattir nise tih a nih bakah Veng leh khaw tinah tlangau hmangin ngenna siam nise, Kohhran tawiawmna ngen ni bawk se, Media platform hrang hrangte tangkai taka hman nise tih a ni a. State pawn atanga halpuah lakluh thin tihtawp (supply reduction) a nih theih nana khauh lehzuala hmalak dan turte sawiho niin, halpuah leh halmawi lakluh veng turin ramri dep Entry Point-ah ngun taka duty insiam leh lirthei veivak endikte, Online hmanga chah thin vente, Police leh YMA tangho a Foot/Mobile Patrolling neih nise tih a ni bawk.

He thutkhawm a tarlan a nih danin nikum hunpui vuakvetah khan halpuah leh halmawi kaihhnawihah Police-in thubuai 5 ziaklutin mi 9 an man a, an zinga 7 te hi thiamloh chantir an ni tawh a. Boruak bawlhhlawh leh bawlhhlawh loh tehna Air Quality Index (AQI) chuan halpuah leh halmawi hal vanglaiin a tehnaah 300 a hawlh kai a ni.