Mizoram Official Taekwondo Championship khelh tan a ni

Mizoram Official Taekwondo Championship vawi 26-na chu nimin khan SAI State Training Centre, Mission Vengthlang Aizawl-ah neih tan a ni a, Agriculture Minister PC. Vanlalruata chuan khuallian niin a hawng a ni.

Ni thum chhung awh tur Mizoram Official Taekwondo Championship hawnna hunah hian Agriculture Minister chuan Taekwondo chu Sport chi hrang hrang zinga pawimawh tak pakhat a nih avangin ngaihhlut zual a pawimawh thu a sawi a. Player-te inpekna chu fakawm a tih thu sawiin, rilru leh tih takzeta khel turin a fuih a. Inelna hmachhawn kawngah rilru hrisel neih a pawimawhzia te, chak leh chak loh dan thiam turte, zuk leh hmuama fihlim turte, insawizawia ei leh in a invawng turte in a chah nghal a. Player-te chu sang tak thleng turin duhsakna a hlan nghal a ni.

26th Mizoram Official Taekwondo Championship hawnna hun hi MATA Vice President R. Lalrinmawia chuan kaihruaiin General Secretary Joseph Thansanga chuan Technical Report pein infiammi te thutiam lakna hun hman a ni.

Mizoram Official Taekwondo Championship hi kum 1989 atangin khelh thin a ni a. He inelnaah hian Mizorama District hrang hrang atangin infiammi an tel thin a, tun tum 26th Mizoram Official Taekwondo Championship bikah hian District pasarih atangin infiammi 372 telin heng infiammite hi Category hrang hrangah then an ni.