Mizoram-ah lirthei 3,15,831 ziahluh a ni tawh

Mizoram Sawrkar Transport Department tarlan danin, kumin August thla tawp thleng khan Mizoram chhungah lirthei 3,15,831 register a ni tawh.

Mizoram-a lirthei register zingah hian lirthei ke hnih nei, Two Wheeler chu register tam ber niin tun dinhmunah Mizoram pumah Two Wheeler 2,16,141 register a ni tawh a, hemi dawt-ah hian mimal Motor chu ziahluh tam niin LMV hi 52,761 ziahluh a ni tawh bawk. Transport Department-in a a tarlan danin, tun dinhmunah Mizoram pumah Two Wheeler Taxi 4133 a awm mek a, passenger phur motor-te ke li nei 5873 awm mekin passenger phur motor tho ke thum nei chi 6341 register tawh a ni bawk a, heng bakah hian sumdawnna atana hman, motor lian bungraw phur chi 22,676 register a nih bakah Car Rental a tlan lirthei 356 a awm mek bawk.

Transport Department-in thla hmasa August ni 31 thlenga Mizoram a motor register tawh a chhinchhiahna-ah hian Mizoram chhungah Bus 565 awm mekin Ambulance 243 register a ni tawh bawk a, lei laihna lirthei, Excavator pawh a vaiin 1193 register a ni tawh bawk.

Transport Department chhinchhiah danin Mizoram chhunga lithei pung chak ber chu lirthei ke hnih nei, Two Wheeler niin kumin sawrkar kumthar ni atanga thla hmasa August ni 31 thleng khan Mizoram chhunga Two Wheeler register thar zat chuan 5049 a tling tawh a, hemi chhung vek hian LMV register zat pawh 378 a nih thu tarlan a ni bawk.