International Literacy Day pualin hun hman a ni

Nimin khan Aizawl-a School Education Directorate Conference Hall-ah ‘International Literacy Day’ hman a ni.

International Literacy Day hi September 8-ah hman thin ni mah se kumin hian Pathianni a nih avangin nimin khan he ni pual hian hun hman a ni ta zawk a, he hun hi T. Lalhlimpuia MLA chuan khuallian nia hmanpuiin Literacy chu tunlai khawvelah a pawimawhna a lian zel a, lehkha ziak leh chhiar chauh ni lovin Computer-a application hrang hrang hrethiam leh hmang thei nih a pawimawh chho zel a ni, a ti a. Adult Education-in Skill Training chi hrang hrang a buaipui chu a tangkai tih sawiin, theihtawp chhuah zel a tul thu a sawi a. Ziak leh chhiar hnufumna hmun chu hmun hla leh kirkhawr a ni deuh zel tih sawiin, heng hmunah te hian Kohhran Missionary-te an awm thin a, kan Missionary-te hmang tangkai zawnga hmalak te pawh a tul hle a ni, a ti bawk.

He hunah hian Adult Education-a Asst. Director T. Lalremsiama chuan he ni hman dan sawiin, kum 1966-a UNESCO General Conference chuan International Literacy Day chu kumtina hman turin a rel a, Mizoram-ah chuan kum 1976 atangin hman thin a ni, a ti a. Kum 2018-a chhut dan chuan Mizorama ziak leh chhiar thiam awm zat hi zaa 96 kan nih thu leh kawng hrang hrangin hmalak chhoh zel a ni a, za-ah za kan nih theih thuai beisei a ni, a ti bawk.

Champhai-ah pawh International Literacy Day pual hian nimin khan I&PR Auditorium-ah hman a ni a, District Bawrhsap VL. Remliana chuan khuallian niin a hmanpui bawk a ni.