Mipuite fimkhur zel turin chah

Mizoram sawrkar chuan kumin ah ruahtui a tam a, ruahtui hi la tla belh zel thei a nih avangin hemi in a nghawng theih lakah mipuite fimkhur turin an chah.

Sawrkar thuchhuah tarlan danin, kumin hian Fur ruahtui a tlak tam avangin Mizoram hmun hrang hrangah chhiatna thleng a tam hle a. Leimin avanga mitthi leh In leh lo chan mi engemaw zat an awm a. Hmun hrang hrangah leimin avangin inkalpawhna lamah pawh harsatna tam tak thlengin, kawng hrang hrangin nunphung a ti khaihlak fo bawk a ni. Heng chhiatna thleng te hi sawrkar chuan pawi a tiin a tuartute pawh a tawrhpui takzet a, mipuite harsatna sukiang tur hian theihtawpin hma a la mek reng a ni, an ti.

Khaw chin thlîrtu, India Meteorological Department (IMD) chuan ruah hi la sur zel turin a tarlang a. Mizoram leilungte a hnip tawh avang leh chhiatna thleng thut thei hmun hrang hrangah a awm avangin mipuite fimkhur theuh turin an ngen nawn leh a. Mahni In leh a vel a tui kal dan te ennawnin, leimin thei hlauhawm leh chhiatna liantham thlen thei awm a awm chuan thuneitute hnenah a rang lama hriattir zel turin mipuite an ngenin an hriattir bawk a. Harsatna awm thei ah sawrkar Department hrang hrangte mahni mawhphurhna theuh hlen tura theihtawp chhuah turin an ngen nawn leh bawk.