Kolasib-ah ram neitu ten kawngpui dan an tintuah

Kolasib District Land Owners' Association hruaitute chuan Forest Department nena thu in hmuhlohna karah Kolasib District mipuite dinhmun a rang lama a chinfel vat a tu tih sawiin, hemi ti hlawhtling tura nawr nan kawngpui dan chah an tum tih an sawi.

    Nimin khan Kolasib Press Club-ah Chanchinbumite kawmin Kolasib District Land Owners' Association hruaitute chuan kum thum hmalam atangin ram inchuhna avanga buaina leh harsatna an lo tawh tawh thu leh Mizoram sawrkar pawh vawi engemaw zat an dawr hnuah tun thlenga an harsatna chinfel sak an la nih loh avangin an thil ngiat nawr nan tun thla ni 25 zing dar 6:00 atangin tiamchin awmlovin RTP Farm, Sethawn-ah NH-06 leh NH-306 (Silchar leh Aizawl inkar) kawngpui danchah an tum thu an puang a. An thilphut zingah Ram neitu nihna sawrkar in chingfel se tih te; Riverine Reserved Forest (RRF) Notification 1965 chu thiah ni rawh se tih te; Kawngpui thlur li Project tihhlawhtlin ni rawh se tih leh Kum 3 chhung hma la thei lova an khuahkhirhna sawrkar in sut rawh se tih te a ni. 

     Land Owners' Assn hruaitute sawi danin, kum 2021 khan Gauhati High Court chuan RRF Notification 1965 chu hman tlak loh leh awmze nei tawh lo; mihring chenna hmun In leh Lo in a khat tawh, tiin a thiat a, Hei hi Forest Department chuan pawm lovin Court in a zirchianna ah he RRF Notification hi Dan diklo a puan a ni, tiin tih nun leh tumin an bei a. Tunhnai ah Environmental NGO te punin Supreme Court-ah an zualko leh a, chu chu Mizoram sawrkar pawhin kumin June thla vel khan thlawpin, he RRF Notification hi Stay an dil zui ta a ni, an ti a. Tun dinhmunah Vairengte leh Sairang inkara cheng mipuite chu RRF avangin an him lo a, an chenna In, huan leh ram ti a an lo cheibawlte chu Forest Department in a chhuhsak mek niin an sawi bawk.