Lokayukta tan CBI-ah consent pek nise an duh

Mizoram Pradesh Congress Committee (MPCC) Sr. Vice President Lalnunmawia Chuaungo chuan ZPM sawrkar chu CBI hnena General Consent pek an ngam lo a nih pawhin, Mizoram Lokayukta-in State sawrkar phalna la kher lova tul a tih hun huna CBI a hman theih nan Consent pe turin an ngen tih a sawi.

MPCC Vigilance Cell-te chuan nimin khan Aizawl Press Club-ah thuthar thehdarhtute kawmin he hunah hian an Party Sr. Vice President Lalnunmawia Chuaungo chuan Chief Minister-in CBI hnena General Consent pek chungchanga December 14, 2023-a Assemby Session-a a sawi, ‘General Consent an pe dawn a, engmah phalna an dil a ngai dawn lo’ a tih dungzuia December 28, 2023-a CBI hnena General Consent an pek chu sut lehin July 1, 2024 khan Consent thar an pe tih a sawi a a, chu consent tharah chuan Mizoram sawrkar hnuaia thawk, Chief Minister, Minister leh sawrkar hnathawk dangte CBI-in a chhui theihna chu hnuk letin, a mal mala State sawrkar phalna ziaka lak phawt tura tih a nih thu a sawi.

Chief Minister-in August 21, 2024 a a thusawi, ‘a hmingah chuan General Consent a la ni reng a, amaherawh chu State employee a huap ta lo’ tih leh ‘chu chu an niin huap rawh se an ti thei lova, tupawh sawrkar se chutiang bak chu an pe thei lo’ a tih chu thudik a nih loh thu MPCC Vigilance Cell chuan sawiin, CBI hnena General Consent pek chu Delhi Special Police Establishment Act, 1946 Section 6 hnuaiah State sawrkar thuneihna liau liau a ni a, eng dan dang hnuaiah mah khapna engmah a awm lo tih an sawi bawk a. “ZPM sawrkar hian CBI hnena General Consent pek an ngam ta lo an nih pawhin, Mizoram Lokayukta in State sawrkar phalna la kher lova tul a tih hun huna CBI a hman theih nan Consent pe turin kan ngen,” an ti a ni.