Raltlan 32 rawn luh belh leh

Tunhnai khan Saitual District-ah Myanmar atanga raltlan mi 32 an lut a, heti hian Mizoram a Myanmar raltlan awm zat chu mi 33,756 an tling ta.

Home Department thuneitute hnen atanga thu dawn danin tunhnaia Saitual District a raltlan lut thar ni a District thuneitute'n an chhinchhiahte hi mipa 8, hmeichhia 5 leh naupang 19-te an ni a. Saitual-ah hian Relief Camp a awm loh avangin an chhungkhat lainate leh thiante an bel ni a thudawn a ni. Hetihlai hian chi leh chi inkara buaina avanga Manipur atanga sahimna zawnga Saitual District a awm mek hi mi 906 an ni a, mi 89-te chu Relief Camp 5-ah dah an ni a, a dang zawng chuan chhungkhat laina leh thiante an belh loh pawhin In luahin an khawsa a ni. 

Tun dinhmunah Zahimna zawnga Mizoram a awm mek Myanmar raltlan 33,756 zinga 10,167 te hi mipa an ni a, hmeichhia 10,805 leh naupang 12,784 an awm bawk. An zinga mi 16,969 te chu District 7-a Relief Camp 129-ah awmin a dang mi 17,787 te chuan lainate leh thiante an bel a, mi In luaha khawsa an awm bawk. 

District malah Champhai District-ah Myanmar raltlan tam berin mi 13,966 zet an awm a, an zinga 6,333 te chu Relief Camp 18-ah dah an ni a, mi 7,633 te erawh chu Relief Camp pawn lamah an awm thung. Siaha District-ah Relief Camp tam berin 41 lai a awm a, raltlan mi 5,953 zinga mi 4,453-te chu Relief Camp-ah hian awmin a dang mi 1,500 te chu Relief Camp pawnah an awm a. Raltlan ngah ber pathumna Lawngtlai District-ah mi 5,922 awmin Relief Camp ngah ber pathumna niin 38 an nei a, Camp-ah raltlan 4,026 awmin pawn lamah mi 1,850 an awm bawk.

Union Home Minister Amit Shah-a'n an ram a ralmuan hma chuan Myanmar atanga Mizorama raltlan lo lutte hi thawnkir luih an nih dawn loh thu Chief Minister Lalduhoma a rawn hrilh ni a sawi a ni a. Tun mai-ah hi chuan an kirna ni khua a la lang rih lo niin a lang.