Kumin ah Dengue vei 369 hmuh an ni tawh

Kumin January atanga August thla tawp thleng, thla 8 chhung khan Mizoram-ah Dengue natna vei hmuhchhuah 369 an awm a, an zinga pakhatin nunna a chan.

Health & Family Welfare Department hotute hnen atanga thudawn danin thla 8 kalta chhung khan Dengue vei ni a inhria mi 5,736 te thisen lakkhawm a endik a ni a, mi 369-te chuan Dengue an vei tih hmuhchhuah a ni a, Aizawl District ami pakhatin nunna a chan phah tih chhinchhiah a ni bawk. Dengue natna hri kai hi Aizawl District-ah tam berin mi 217 an awm a, Lunglei District-in dawtin mi 131 an awm a, District dangah chuan sawi tham an awm lo a. State dang ami lokal inringhlel mi 27 thisen an endik zingah Dengue hri kai hmuhchhuah an awm lo bawk.

Kum 2019 atanga tun thleng hian Mizoram-ah Dengue natna avanga nunna chan hi 8 an awm tawh a, an vai hian Aizawl district ami vek an ni a. Kum 2022 khan Dengue avang hian Mizoram-ah mi 5 an thi a, nikum-ah 2 thih belh lehin kumin ah pakhat a thi leh a ni. Nikum kha Dengue vei hmuh hhuah tam ber kum a ni a, Sample 12,949 endik zinga mi 2,060 te chuan Dengue an vei tih hmuhchhuah a ni.