Uchuak taka mipuite sum khawh ralna ah ngai

Mizoram sawrkarin Minister leh Minister tlukpui mimal In cheina atana mipui sum cheng nuai 110 a hmang tawh nia lang chu uchuak taka mipuite sum khawhralna ah an ngaih thu PC Party chuan an sawi.

Nimin-a thuchhuah an siamah PC Party chuan Mizoram sawrkar in hun rei tak sum harsatna a tawk tawh tih sawiin, “Sawrkar hnathawk hlawh pawh a hunah kan pe kim thei lo reng a, kan kawngpui te pawhin a chhiat phah a, mipuiin a hun taka electric bill kan pe chung pawhin sawrkarin Electric bill cheng vaibelchhe tel kan bat reng phah a. Hetiang sum harsatna lak atanga kan chhuah theihnan hian sawrkarin inrenchem a ngaih thu sawi rengin mipui pawhin sum renchem zawnga sawrkar hmalakna kan thlawp a. Sum hmuh belh tura mipui phur tirit zawnga sawrkar hmalakna pawh mipuiin kan dodal phal lo a ni,” an ti a.

Hetiang anih lai hian RTI hmanga mipuiin an lo hriat tak, Minister leh Minister tlukpui te In cheina atana mipui sum cheng nuai 110 lai hman a ni chu zialo an ti hle tih tarlangin, “Kan Minister leh Minister tlukpui leh kan VIP thenkhat te bungalow leh Quarters-ah chengin heng an chenna hi pawisa tam tak taka chei niin chung chuan sawisel a hlawh,” an ti a. Hemi ni mai lova bungalow emaw Quarters pawha cheng lo Cabinet Minister K. Sapdanga (cheng nuai 12), Vanlalhlana (cheng nuai 12), Lalthansanga (cheng nuai 12), Vanlalthlana (cheng nuai 12) leh PC. Vanlalruata (cheng nuai 12) te; Minister of State F. Roding-liana (cheng nuai 10), B. Lalchhanzova (cheng nuai 10), Prof. Lalnilawma (cheng nuai 10) leh Lalnghinglova Hmar (cheng nuai 10) te leh Adviser to CM H. Ginzalala (cheng nuai 10) te In chei nana belhkhawma cheng nuai 110 lai hman a ni chu kan ram sum dinhmun atanga thlirin a awm ang lo an ti hle tih an sawi a. “Sum hnanna kawnga lo insum ve turin kan milian te PC Party chuan kan ngen a ni,” an ti bawk.