Agriculture Produce Wholesale Market 2 sa dawn

Agriculture & Farmer Welfare Minister PC. Vanlalruata chuan Aizawl kawtchhuah hmun pahnih ah ‘Wholesale Market’ sak a nih tur thu a sawi.

Tunhnaia chanchinbu mite a kawmnaah Agriculture Minister PC. Vanlalruata chuan, Agriculture Department hmalakna hnuaiah Aizawl kawtchhuah hmun pahnih ah thlai thar zawrhna tur, Agriculture Produce Wholesale Market sak a ni dawn tih sawiin, hemi atan hian pawisa pawh tihfel a ni tawh niin a sawi a. Agriculture Produce Wholesale Market hi Sihphir leh Melriat-ah a sakna tur hmun an ruahman tawh tih sawiin, Thlai zawrhna hmun tur sakna tur hian Mizoram sawrkar chuan cheng nuai 1,000 an nei tawh a, cheng nuai 500 ve ve hmanga sak tur a ni ang, a ti bawk.

Agriculture Minister sawi dan chuan Market Building Drawing hi an buaipui mek a, Drawing peih a nih hunah tih tur tulte an ti ang a, building sak hna tan nghal a ni ang. Heng bakah hian Aizawl chhak leh thlang lama kawtchhuahah pawh Wholesale Market sak tum a nih thu Minister chuan a sawi bawk a. Agriculture Produce Wholesale Market-ah hian thlai thar vawnthatna tur Cold Storage, Kut hnathawktute hahchawlhna (Rest Room) bakah ATM booth-te dah tum a ni.