Kum 2023-ah Mizoram-ah nau piang 27,180 leh thi 9,037 awmin Hmeichhia aiin Mipa an tam ve ve
Economics & Statistics Department-in tunhnaia ‘Annual Report of Registration of Births & Deaths Mizoram, 2023’ a tihchhuah atanga a lan danin nikum chhunga Mizoram nau piang 27,180 zinga 14,071 chu Mipa niin Hmeichhia 13,109 an awm bawk a, Piang (birth rate) hi 18.89% a ni. Report tarlan danin nikum chhung khan mipa 1,000 zelah hmeichhia 931.6 piang anga chhut a ni a. Nikum chhung vek khan Mizoram pumah thi 9,037 awmin heng zinga 5,877 chu Mipa an ni a, Hmeichhia thi 3,160 an awm bawk a, thi (death rate) hi 6.28% a ni. Nikum chhung vek hian naupang thi 360 awmin naupang thihna (Infant Mortality Rate) 13.25% a ni a. Nau thi saa piang 88 an awm bawk.
Report tarlan danin Mizoram District 11 zingah Kolasib, Serchhip, Khawzawl leh Hnahthial District-ah te Mipa aiin Hmeichhia piang an tam zawk a, a bak District pasarih-ah chuan piang zingah mipa an tam zawk a. Nikum chhung khan Aizawl District-ah piang tam berin 10,727 an awm a, Hnahthial District-ah tlem berin 370 an awm thung a. Thi zingah pawh Aizawl District tam berin mitthi 4,142 chhinchhiah a ni a, Khawzawl District chu a tlemna ber niin mitthi 171 chhinchhiah a ni a. Aizawl District-a nau piang leh thi an tam ber chhan hi District hrang hrang atanga Aizawl khawpui damdawi In pantu zingah piang leh thi an tam vang nia hriat a ni.
Annual Report tarlan danin nikum chhunga Mizoram naupiang leh thi hi Mizoram hmun hrang hrang 881 atanga Registrars of Births & Deaths-ten an bial chhung theuh atanga an lakkhawm an ni a. Birth rate hi tunhnai kum riat chhung vel atang khan a chhe hle a, 20% pawh a tling ngai lo a. Chhinchhiahna atanga a lan danin tunhnai kum 12 (2012-2023) chhunga nau piang tlem ber chu kum 2018 kha niin nau piang 20,984 an awm a, hemi kuma nau piang (birth rate) hi 16.25 a ni.
Economics & Statistics Department thawktute chuan Europe, Japan leh Korea ramah pawh nau piang an tlem vang hian sawrkar an mangang mek niin an sawi a. Nau piang tlem chhan chu eizawnna leh hna tha duh vanga nupui/pasal nei duh lo te, nupui/pasal inneih tlai vanga fa neih tam theih loh vang leh retheihna vanga fa neih tam lohte chu a chhan ber nia an hriat thu an sawi.