Kumin ah Sawhthing quintal nuai 11 dawn thar beisei

ZPM sawrkarin kuthnathawktute tharchhuah man man zawka hralh tura inthlan hma leh an sawrkar hnua thu an tiam avangin kumin hian Sawhthing quintal nuai 11 thelh thar beisei a ni.

Horticulture Department hotute sawi danin kumin hian chhungkaw 25,102 chuan ram acre 27,608.528 a zau-ah Sawhthing quintal 1,68,583 leh kg 298 an ching a. An tharchhuah theih zat tur hi quintal 10,93,299 vel ni a chhut a ni. Hetihlai hian Sawhthing a tam nasat avangin Sawhthing chingtu tam takin harsatna an tawk mek a, hetianga kumin a Sawhthing ching chhungkua leh sawhthing chin a lo pun tak chhan hi sawrkarin a hralhna a hmuhsak dawna an rin avang leh Sawhthing man a tlakhniam pawha sum an hloh lohna tur atana sawrkarin sum thawh sak a tiam vang niin a lang.

Kumin hian Sawhthing a T^m nasa hle a, hemi avang hian kuthnathawktute hian an thawhrah ang an seng lovang tih an hlau hle a. August ni 16-a Horticulture Department hnena report lut atanga a lan danin Sawhthing chingtu chhungkaw 25,102 zinga chhungkaw 6,568 te Sawhthing chinna ram, khaw 236 chu Sawhthing tam hian a khawih a. 'Operation Ginger 2024 - Fehchhuah Runpui' -ah chuan Nilaini thleng khan khaw 367 a Sawhthing chingtu mi 5,376 te hnenah zirtirna pek a ni tawh a ni.